Oqiǵa bolǵan Qosózen aýylynyń turǵyndary mektep ainalysyndaǵy jolda oqýshylardyń qaýipsizdigi múldem saqtalmaǵanyn aitady. Olardyń aitýlarynsha, munda jol erejesine qatysty qaýipsizdik belgileri túgili, balalar júretin trotýar da joq.
Jergilikti ákimdik tek qaiǵyly jaǵdaidan soń qimyldap jatyr.
Sabaqtan soń alańsyz úiine qaityp kele jatqan balany sol mektepte jumys isteitin muǵalim qaǵyp ketken.
"Mektep mańynda qaýipsizdik sharalary saqtalsa mundai kúige túspes edik", – deidi balalarynan aiyrylǵan áke-sheshesi.
Otbasynda bir qyzdan keiingi Erasyl úiiniń kenjesi eken. Sol kúni mektepke ketken uldy qaitar jolda ápkesi jetektep kele jatypty. Qas-qaǵym sátte júitkigen kólik túirep ótken bala aýrýhanaǵa jetpei kóz jumǵan.
“Qulyndai bop erkelep júrgen bala edi ǵoi. Jeti jastaǵy bala, eń tátti kezi. Sabaǵyn da beske oqityn. Bes jasynan bastap sabaqqa barǵan. Men ulymnyń atynan shaǵym aitaiyn dep turǵan joqpyn. Biraq mektepti aidalaǵa salyp tastaǵan. Myna jerde júk kólikteri aǵyp júredi. Trotýar jasap berý kerek edi. Eki jaǵynda qorshaýymen jasaý kerek edi”, –deidi Erasyldyń ákesi Janahmet Altybaev.
Qaiǵyly oqiǵa oryn alǵan soń jergilikti turǵyndar balalaryn mektepke jiberýden qorqyp qalǵan.
“Eń birinshiden, balalardyń qaýipsizdigin oilamaidy. Bizde balalar eki jaqtan keledi. Ne joly joq. Qarapaiym halyqqa bolýy kerek nárseni biz nege arttarynan júgirip suraýymyz kerek? Biz nege kúnde qorqynyshpen ómir súrýimiz kerek?! Balamyz úige tiri kele me, kelmei me dep, qashanǵy úreimen otyramyz?” – deidi Jibek Syzdyqova.
“Myna jaqta 4-5 karer bar dep estimiz. "KamAZ" degender kúndiz-túni bizdiń joldan úzilmeidi. Jolymyz tar. Bir úidiń kishkentai balapany ketip otyr. Mindetti túrde sondai shyǵyn bolý kerek pe edi, sondai zańdylyqty isteý úshin. Mynaý sumdyq qoi!” – deidi Kámila Ysqaqova.
Oqýshy óliminen soń ákimdiktegiler qozǵala bastapty. Saiajaidan balalardy tasýǵa eki avtboýs bólinipti. Tas jol ústine jyldamdyqty báseńdetýge septigin tigizetin kedergiler qoiylǵan. Jaqyn kúnderi jyldamdyqty asyrmaýdy eskertetin belgiler ornatamyz dep sendirgen sheneýnikter trotýar máselesin de sheshemiz deidi.
“Bizdiń tarapymyzdan hat jazyldy. 900 metrlik trotýar, jaryqtandyrýmen birge. Qazir jumys bastaldy, qazan aiynda júrgizip beremiz. Endi aýyl turǵyndarynyń suraýy boiynsha, myna jaqqa da taǵy 900 metrlik trotýar salsyn dep jatyr. Barlyǵy 18 myń metr, soǵan 35 million teńge qarajat bólinip jatyr”, – deidi Qaraoi aýyldyq okrýginiń ákimi Aidos Tájenov.
Al politseiler kólikti tizgindegen 23 jastaǵy dene shynyqtyrý sabaǵynyń muǵalimine qatysty qylmystyq is qozǵalǵanyn aitady. Qazir sotqa deiingi tergeý barysynda qaiǵyly oqiǵanyń mán-jaiy anyqtalyp jatyr.
https://www.youtube.com/watch?v=EhFd04dMSN0
https://dalanews.kz/news/67767-assambleia-zhanyndagy-mediaciia-instit
