Úshinshi AES Shardara jaǵasynda salynýy da múmkin. Bul týraly DALA INSIDE arnasy jazdy, dep habarlaidy Dalanews.kz.
"Qytai salatyn úshinshi atom elektr stantsiiasy Shardara jaqqa qoiylý múmkin. Jabyq esik jaǵdaiyndaǵy talqylaýlarda osy nusqa kóbirek aityla bastady", - dedi, DALA INSIDE derekkózi.
Insaiderdiń aitýynsha, ońtústik óńir basqalarǵa qaraǵanda elektr energiiasynyń tapshylyǵyn qatty sezinýde. Al demografiialyq-migratsiialyq boljamdarǵa sai, 2030 jyldarǵa qarai bul másele tipti ýshyǵady. Túrkistan oblysynda jaryq grafikpen óshirilip, berilip otyratyn jaǵdaiǵa tap bolýymyz múmkin.
"Negizi jospar boiynsha Balqashtaǵy úlken AES "Soltústik-Ońtústik" jelisi arqyly ońtústiktegi defitsitti jabýy tiis edi. Biraq onyń ýaqytyly salynatynyna Úkimettiń ózi senbei otyr. Sebebi Rosatomnyń Túrkiiadaǵy daǵdarysy biraz nársege kózdi ashyp berdi. Balqashtaǵy qurylys quryǵanda 20 jyldyń ishinde salynyp bitedi degenge de esh kepildik joq. Sondyqtan Qytaidyń CNNC korporatsiiasy arqyly Shardara jaqqa eki HPR-1000 reaktoryn tez arada qoiyp, mobildi AES jasap alý ideiasy logikaǵa saiyp tur", - deidi insaider.
Byltyr ońtústik óńirlerge 3,3 mlrd kVt/saǵat elektr energiiasy jetpedi. Ol tapshylyq manevrli qýat arqyly Reseiden importtaldy jáne osy úshin Qazaqstan Reseige 100 milliard teńgeden astam somany tóleýge májbúr boldy. Biylǵy defitsit odan da kóp bolýy tiis.
Eldiń elektr balansynda Túrkistan oblysy, Qyzylorda oblysy men Shymkent qalasy basty problemaǵa ainalyp otyr. Adam sany tez ósýde jáne jańa óndirister qaptap ashylýda. Bárine molynan jaryq kerek. Aimaqtaǵy sý elektr stantsiialary men kómir stantsiialarynyń qýaty jetpeidi. Ekibastuzdaǵy GRES barynsha jyrtyqty jamaǵysy kelse de onyń da shamasy jetpei jatyr.
"Bastysy, qytailar atom elektr stantsiiasyn tez salýy tiis. Eger 7 jylǵa úlgerse, biz defitsit problemasyn ýshyqtyrmai sheshe alamyz", - dep jazdy arna.
