Qazaqstan prokatyndaǵy jańa kóshbasshy – rejissior Dýman Erkimbektiń debiýttik tolyqmetrajdy filmi «QAITADAN» úsh apta ishinde 1 mlrd teńgeden astam tabys jinap, otandyq kinoprokatta kósh bastady. Ári kino óndirisine jumsalǵan memleket qarajatyn bes esege artyǵymen aqtaǵan alǵashqy joba,- dep habarlaidy Dalanews.kz
Kórermen kózaiymy bolǵan «QAITADAN» kinosy oqiǵa jelisimen ǵana emes, vizýaldy qýatymen de baýraidy. Bul film – kórkem shyǵarma ǵana emes, shynaiy sezimge negizdelgen, tereń dramalyq mazmundaǵy týyndy. Kino astarynda qaýipsizdik, jaýapkershilik pen birlik jaily tereń oi tastaityn ári jastardy dostyqqa, baýyrmaldyqqa jeteleitin tustary bar. Ár dialog – búgingi qoǵamǵa oi salady, ár kórinis – kórermenniń júregine jaqyn.
Filmde otbasy institýty dáriptelip, áleýmettik jaýapkershilik pen adamgershilik qaǵidattary kórinis tabady. Sebebi ózińdi ǵana emes, ainalańdy, tipti tutas qoǵamdy qutqarýǵa umtylý – ár adamnyń mindeti.
«QAITADAN» - qazaq kinosynyń jańa beleske kóterilgenin kórsetetin eńbekterdiń biri. 2023 jyly pitching jeńimpazy atanǵan bul joba QR Mádeniet jáne aqparat ministrligi jáne Ulttyq kinony qoldaý memlekettik ortalyǵynyń qoldaýymen túsirilgen bolatyn.
Kino – bekzat óner. Qoǵamda alar orny erekshe. Búginde Qazaqstannyń kinoindýstriiasy Mádeniet jáne aqparat ministri Aida Balaevanyń jiti basshylyǵymen qarqyndy damyp keledi. Bul ulttyq kontentti ilgeriletýge, turaqty qoldaý júiesin qalyptastyrýǵa jáne halyqaralyq yntymaqtastyqty keńeitýge múmkindik berip otyr.
«Bul – elimizde jas rejissiorler men debiýttik jobalarǵa naqty múmkindik berilip otyrǵanynyń jarqyn kórinisi. Rejisser Dýman Erkimbek, prodiýser Jalyn Tileýbergen syndy jańa tolqynnyń bastaýy. «QAITADAN» - osynyń aiqyn dáleli. Mundai sapaly jobanyń halyqqa keńinen tanylyp, kórermenniń kóńilinen shyǵýy júieli jumysymyzdyń nátijesi» - deidi Ulttyq kinony qoldaý memlekettik ortalyǵynyń Basqarma tóraǵasy Qurmanbek Jumaǵali.
Sońǵy eki jylda otandyq kinoindýstriiada birqatar mańyzdy reformalar júzege asty. Solardyń ishinde asa mańyzdylarynyń biri – konkýrstyń jańa erejesi. Reformanyń negizgi maqsaty – ádilettilik pen ashyqtyqty qamtamasyz etý, sondai-aq kinogerler úshin konkýrsqa qatysý protsesin barynsha jeńildetý.
Saraptama keńesiniń daýys berý mehanizmi de jańartyldy. Keńes músheleri - ár jobanyń stsenariiinen bastap, óndiriske deiingi kezeńdi súzgiden ótkizedi. Tildiń tazalyǵyna da airyqsha mán beredi. Osynyń arqasynda debiýttik jobalarǵa erekshe nazar aýdarylyp, jas rejisserlerdiń týyndylaryna senim kúsheidi.
Irikteýden ótken kinojobalar óndiriske jiberilip, úlken ekranǵa deiin tolyq súiemeldenedi. Bul úshin Ortalyqta ár jobaǵa jeke menedjer taǵaiyndalǵan.
Biyldyń ózinde 12 ulttyq film úlken ekranǵa shyqty.
Eń bastysy – san emes sapa basty nazarda! Otandyq filmder kórermenge barynsha qoljetimdi bola bastady. Sońǵy jyldary arhivte jatqan barlyq filmder prokatqa shyǵarylyp, qalyń kórermenge usynyldy.
Ushaq borttarynan bastap strimingtik platformalarǵa, telearnalardan shalǵai aýyldardaǵy kórsetilimderge deiin – ulttyq kinony kórýge múmkindik artty.
Óńirlerde «Qazaq kinosynyń onkúndigi» ótkizildi. Jańa týyndylar kópshiliktiń nazaryna ilikti.
«JARQYRA» respýblikalyq kastingi jariialandy. Nátijesinde anyqtalǵan jańa talanttardyń kásibi ósýin qamtamasyz etý jáne olardy ulttyq kinematografiianyń jańa jobalaryna tartý. Aimaqtardaǵy talantty jastardy qoldaýdyń arqasynda kino áleminde jańa esimder men jańa lep bolýy haq.
Ortalyqtyń qoldaýymen túsirilgen týyndylar halyqaralyq deńgeide de keńinen tanylyp keledi. Sońǵy derekterge sáikes, qazaqstandyq filmder 300 halyqaralyq kinofestivalge qatysyp, 177 júlde jeńip aldy.
Bul aýqymdy jumystar ulttyq kinematografiianyń kókjiegin keńeitip, ony ári qarai damytýǵa, qazaq mádenietin álemge tanytýǵa múmkindik beredi.
Kino – óner, ol – ideologiia. Al ideologiianyń basty kúshi – sanaǵa tóńkeris jasaý, igi isterdi nasihattaý.
