UQK-niń 27 jastaǵy ofitseri kámeletke tolmaǵan qyzdyń eresek seriginen aqsha men páter bopsalady dep aiyptalyp otyr, dep habarlaidy dalanews.kz.
Aiyptaý nusqasyna sáikes, áskeri kontrbarlaý bóliminiń jedel qyzmetkeri, aǵa leitenant birneshe bap boiynsha qylmystyq jaýapkershilikke tartylyp jatyr. Oǵan jeke ómirge qol suǵylmaýshylyq pen derbes derekterdi qorǵaý týraly zańnamany buzý, asa iri mólsherde bopsalaý jáne aýyr qylmys týraly habarlamaý boiynsha aiyp taǵylǵan.
Is materialdaryna sáikes, kontrbarlaý ofitseri tanysynan 15 jastaǵy qyzdyń eresek er adammen qarym-qatynasta bolǵanyn jáne jynystyq qatynasqa túskenin bilgen. Alaida politsiiaǵa habarlaýdyń ornyna ol qyzdyń anasymen jáne ápkesimen birge er adamǵa qysym jasaýǵa kelisken.
Tergeý nusqasy boiynsha, olar er adamdy politsiiaǵa habarlaityndaryn jáne týystarynyń aldynda masqaralaityndaryn aityp qorqytqan. Sonymen qatar kámeletke tolmaǵan qyzben jynystyq qatynasqa barǵany úshin ony koloniiada ne kútip turǵanyn aityp, psihologiialyq qysym kórsetken.
Kontrbarlaý qyzmetkeri qyzmettik jaǵdaiyn paidalanyp, áriptesi arqyly quqyq qorǵaý jáne arnaiy organdardyń aqparat almasý júiesinen er adamnyń páteri kimniń atyna tirkelgenin jáne ol týraly basqa da derekterdi anyqtaǵan. Keiin bul málimetterdi qyzdyń anasy men ápkesine bergen.
Osy derekterdi alǵannan keiin olar er adamnan politsiiaǵa júginbeý úshin quny 34 mln teńgeden asatyn páter men 5 mln teńge qolma-qol aqsha talap etken.
Tergeý málimetinshe, osylaisha kúdiktiler jábirlenýshige qorqynysh pen psihologiialyq qysym atmosferasyn qalyptastyrǵan.
Aiyptaý nusqasyna sáikes, KNB qyzmetkeri er adammen kezdesip, ózin qyzdyń aǵasy ári KNB qyzmetkeri retinde tanystyrǵan. Ol qyzmettik mártebesin kórsetip, jábirlenýshi týraly qupiia aqparatqa qol jetkize alatynyn ańǵartqan.
Sonymen qatar ol er adamnyń anasyna qońyraý shalyp, ulynyń óziniń 14 jastaǵy qaryndasyn zorlaǵanyn bilesiz be dep suraǵan. Áiel qorqyp, telefon tutqasyn qoiǵan.
Psihologiialyq qysymnan keiin er adam bopsalaýshylardyń talabyna kelisip, KNB qyzmetkerine 5 mln teńge men páteriniń qujattaryn bergen. Osy kezde jábirlenýshi kómek surap politsiiaǵa júgingennen keiin ofitser ustalǵan.
Qyzdyń anasy men ápkesine de asa iri mólsherde bopsalaý jáne aýyr qylmys týraly habarlamaý baptary boiynsha aiyp taǵylǵan.
Sonymen qatar kámeletke tolmaǵan qyzben jynystyq qatynasqa barǵan er adamǵa politsiia «Zorlaý» baby boiynsha qylmystyq is qozǵaǵan.
Is boiynsha taǵy bir nazar aýdararlyq jait – qyzdyń anasy er adammen kezdesýdi politsiia bóliminiń aýlasynda uiymdastyrǵan.
Sotqa deiingi tergep-tekserý barysynda qyzdyń anasynan kámeletke tolmaǵan qyzben jynystyq qatynas bolǵanyn estigen, biraq bul týraly tiisti organdarǵa habarlamaǵan politsiia qyzmetkeri kýáger retinde ótip jatyr.
