British Airways áýe kompaniiasy Úndistannyń Haidarabad qalasynan Londondaǵy Hitroý áýejaiyna baǵyt alǵan BA276 reisinde bolǵan oqiǵadan keiin ishki tekserý bastady. Ushý kezinde reisti basqarǵan úsh ushqyshtan birdei taǵamnan ýlanýǵa uqsas belgiler baiqalǵan, dep habarlaidy dalanews.kz.
Bir ushqyshqa meditsinalyq kómek qajet boldy
NDTV málimetinshe, ushqyshtardyń biri ózin óte nashar sezinip, mindetin ári qarai atqara almaǵan. Ushaq bortynda oǵan ottegi berilgen. Londonǵa qonǵannan keiin ushqyshqa meditsinalyq kómek kórsetildi.
Qalǵan eki ushqysh ta ózin jaisyz sezingen. Ushý barysynda olardyń jaǵdaiy nasharlai túskenimen, reis aiaqtalǵanǵa deiin mindetterin atqara alǵan.
British Airways ókilderi jolaýshylardyń qaýipsizdigine eshqandai qater tónbegenin málimdedi.
Ýlanýdyń yqtimal sebebi qandai?
Aldyn ala málimet boiynsha, úsh ushqysh ta reiske shyǵar aldynda Haidarabadtaǵy qonaqúide birge tańǵy as ishken. Ekipaj músheleri osy qonaqúide bir tún aialdaǵan.
Sonymen qatar olar syrtqy kompaniia jetkizgen bótelkedegi sýdy ishken.
Oqiǵadan keiin úsh ushqysh ta aviatsiialyq qaýipsizdikke qatysty esep toltyrdy. Sondai-aq densaýlyqtarynyń nasharlaý sebebin anyqtaý úshin olardan biologiialyq synamalar alynǵan.
British Airways tekserý bastady
Áýe kompaniiasy oqiǵanyń barlyq mán-jaiyn, sonyń ishinde Haidarabadta ekipaj múshelerin ornalastyrý jaǵdailaryn tekserip jatyr.
"Áriptesterimizdiń densaýlyǵy men ál-aýqaty – bizdiń basty basymdyǵymyz. Osy jerde ekipaj músheleriniń syrqattanýyna qatysty birneshe bólek habarlama túskennen keiin, olardy ornalastyrý jaǵdailaryn qaita qarap jatyrmyz", – delingen British Airways málimdemesinde.
Qazir áýe kompaniiasy ishki tergeý aiasynda ekipajdardyń qonaqúidegi jaǵdaiyn tekserip jatyr. Quzyrly qyzmetter ushqyshtardyń ózin jaisyz sezinýine naqty ne sebep bolǵanyn anyqtaýda.
British Airways ázirge tekserý nátijelerin jariialaǵan joq jáne ekipaj músheleriniń taǵamnan ýlanǵanyn resmi túrde rastaǵan joq. Sondyqtan taǵamnan ýlaný nusqasy ázirge aldyn ala boljam retinde qarastyrylyp otyr.
