– Biyl etnofestivalge 12 memlekettiń ókilderi qatysty. Osy rette mańyzdy mádeni sharaǵa Malaiziia eliniń qatysýy biz úshin tosynsyi boldy. Olar Almaty baýraiynda ótetin sharaǵa qatty qyzyǵýshylyq tanytyp, aldaǵy ýaqytta da qatysatyndaryna aitty.
Biyl halyqqa qolaily bolýy úshin kiiz úilerdi úsh ese kóp tigip, meiramhanalardyń sanyn eki esege arttyrdyq. Budan basqa sharaǵa qatysýshylardyń qarasy da kóp boldy.
Kiiz úilerde kórmeler, kitap saýdasy uiymdastyrylady. Osy rette sharaǵa belsene qatysqan árbir ónerpazǵa alǵys aitamyn. Almaty qalasy ákimdiginiń qoldaýynyń arqasynda bizder «Uly dala – kóshpendiler álemi» halyqaralyq etnofestivali dástúrldi túrde ótip turatyn mańyzdy sharalardyń birine ainaldyrdyq. Kerek deseńiz, «Uly dala – kóshpendiler álemi» bul Almaty qalasynyń mańyzdy brendine ainaldy desek artyq aitqandyq bolmas. Sharamyzǵa týrister kóp keldi, – dedi Almaty qalasy Mádeniet basqarmasynyń basshysy Ǵani Mailybaev.
Senbi-jeksenbi kúni ótken mádeni sharaǵa 10 myńnan astam qala turǵyndary qatysyp, kóshpendilerdiń salt-dástúrlerimen tanysyp, qazaq ashanasynyń ulttyq taǵamdarynan dám tatqan.
Almaty qalasyndaǵy Qazaqstan halqy Assambleiasy tóraǵasynyń orynbasary, qazaq-orys mádeni ortalyǵynyń tóraǵasy Vsevolod Lýkashovtyń aitýynsha, bul shara shyn máninde elimiz úshin eleýli oqiǵa bolǵanyn alǵa tartty.
– Bul óte mańyzdy oqiǵa. Sebebi ol qazaq halqynyń turmysyn, mádenietin, salt-dástúrin nasihattaldy. Sonymen qatar kóshpendiler men keń dalany mekendegen halyqtardyń salt-dástúrin jáne qazaq halqynyń búkil keńdigin kórsetildi. Sharaǵa qatysýshylar ulttyq taǵamdardan dám tatyp, dástúrli jarystardy tamashalady. Óz basym jas urpaqtyń baǵyzy zamandarda qazaq halqynyń qalai turmys keshkenin bilip ósýi óte mańyzdy dep esepteimin. Mundai sharalar biz qai jerge tamyr jaiǵanymyzdy, Jańa Qazaqstanymyzǵa qandai jolmen jetetinimizdi kórsetedi. Sondyqtan Qazaqstan halqy Assambleiasy «Uly dala – kóshpendiler álemi» sharasyn barynsha qoldaidy, – dedi Vsevolod Lýkashov.
Sahnada Qazaqstannyń ǵana emes, burynǵy TMD elderiniń de ónerpazdary ózderiniń ónerlerin kórsetti.
– Sharada bizder Ázirbaijannyń Alpaýyt dep talatyn jekpe-jek ónerin tanystyrdyq. Bul túrki halyqtarynyń jekpe-jek óneri desek bolady. Sońǵy 10 jyldan beri beri osy jekpe-jek ónerin halyqaralyq deńgeide nasihattap kelemiz. Alpaýyt jekpe-jek saiysyna qatysýshylar oiý-órnekpen órnektelgen ulttyq kiim kiip shyǵady. Al iyǵynda jebe qoramsasy boldy. Etnofestivaldiń ekinshi kúni sportshylarǵa jekpe-jek seminaryn ótkizdik. Osy etnofestivalge shaqyrtý alǵanymyzǵa óte qýanyshtymyz, – dep Dúniejúzi boiynsha Alpaýyt federatsiianyń direktory Vasif Namazov oiyn ortaǵa saldy.
Jinalǵan qaýym kóshpendilerdiń jekpe-jek oiyndaryn, at baptaý, aitys óneri armansyz tamashalady. Shara barysynda Qazaqstannyń ulttyq shopan itter klýby qazaqy tóbetterdiń kórmesin uiymdastyryp, tóbetterdiń qazaq halqynyń turmys-tirshiliginde qanshalyqty orynǵa ie ekenin pash etti.
Osylaisha jinalǵan qaýym halyqaralyq etnofestivaldiń baǵdarlamasy bai, mazmundy ekenderine kózderi jete tústi.
– Men Atyraý qalasynan keldim. Sharaǵa qazaqtyń jeti qazynasynyń biri qazaqy tóbetti kópshilikke tanystyrdyq. Sharaǵa qatysqan tóbetterdiń bári jaiylymda mal qarap júrgen itter. Arasynda qasqyrmen betpe-bet kelip, maldy qorǵap qalǵan syrttandar bar, – dedi «Bakýtan» qoǵamdyq qorynyń ókili Daniiar Janǵaliev.
Osylasha almatylyqtar men qala qonaqtary Uly Dala kóshpelileriniń ejelgi mádenieti men dástúrine jaqyn tanysyp, shat-shadyman bolyp tarqady.
