Ál-Farabi atyndaǵy Qazaq ulttyq ýniversitetinde Túlekter kúnin merekeleý aiasynda kórnekti ǵalym, QR UǴA qurmetti akademigi, himiia ǵylymynyń doktory, professor Habibolla Qusaiynuly Ospanovtyń qurmetine arnalǵan ataýly zal men oqý aýditoriiasynyń saltanatty ashylý rásimi ótti, dep habarlaidy dalanews.kz.
Himiia jáne himiialyq tehnologiia fakýltetiniń tórtinshi qabatynda ornalasqan jańa bilim berý keńistigi Túlekter kúnine orai jáne ýniversitet bitirgen metsenattardyń demeýshiligimen tolyq jańartyldy.
Saltanatty shara akademik Habibolla Ospanov atyndaǵy zaldyń ashylýymen bastalyp, onyń lentasyn QazUÝ-dyń Basqarma Tóraǵasy – Rektor Janseiit Túimebaev, Senat depýtaty Altynbek Nuhuly jáne akademik Murat Jurynov qidy. Shara barysynda aqyn Aspanbek Shuǵataevtyń «Jyr shashý» arnaýymen súiemeldengen ǵalym biýstiniń saltanatty túrde perdesi túrildi.
Jiynda sóz sóilegen ýniversitet rektory Janseiit Túimebaev professor Habibolla Ospanovtyń ǵylymi murasy halyqaralyq deńgeide joǵary baǵalanǵanyn jáne onyń otandyq ǵylym men joǵary bilim berý salasynyń damýyna ólsheýsiz úles qosqanyn atap ótti. Rektor óz sózinde ǵalymnyń mineraldardyń erý kinetikasy men sýtek energetikasy baǵytyndaǵy zertteýleri búgingi kúni de ózektiligin saqtap otyrǵanyn, ol negizin qalaǵan ǵylymi mektep kóptegen jas ǵalymdardyń qalyptasýyna jol ashqanyn tilge tiek etti. Janseiit Qanseiituly Habibolla Qusaiynulynyń ónegeli ómir joly men ǵylymi qyzmeti jastar úshin eńbekqorlyqtyń, adaldyqtyń jáne otanshyldyqtyń jarqyn úlgisi ekenin aita kele, bul ataýly keńistikter tek oqý aýditoriiasy ǵana emes, ǵylymǵa degen qurmettiń, ustazǵa taǵzymnyń jáne ǵylymi sabaqtastyqtyń simvoly ekenin bildirdi.
Shara aiasynda ýniversitet basshysy Parlament Senatynyń depýtaty Altynbek Nuhulyna joǵary bilim men ǵylymdy damytýǵa qosqan úlesi úshin «Ál-Farabi altyn medalin» tabys etti.
Saltanatty shara zamanaýi úlgide jabdyqtalǵan №418 oqý aýditoriiasynyń ashylýymen qorytyndylandy. Lenta qiiý rásimine akademiktiń balalary men jaqyn týystary qatysty. Professordyń shákirtteri men jaqyndarynyń qoldaýymen júzege asyrylǵan bul igi bastama ǵalym murasyn Qazaqstannyń bolashaq himikteri úshin saqtaý maqsatyn kózdeidi.
