Baspasóz máslihaty kezinde BAQ ókilderi Lezebnikten Ýkraina qazirgi jaǵdaida Qyrymdy qaitaryp alady degen oidyń qanshalyqty aqylǵa qonymdy ekenin surady.
Ýaqytsha senimdi ókil buǵan jaýap retinde Eýropa parlamentiniń biylǵy 4 aqpandaǵy rezoliýtsiiasyn mysal qylyp keltirdi. "Reseiden sanktsiialardy túbegeili alyp tastaý - Qyrymnyń Ýkraina baqylaýyna qaitarylýy. Bul Eýropalyq odaqtyń eki abyroily organynyń biriniń ustanymy. Al keleshegi jaily aitar bolsaq, Reseidegi qazirgi rejimde bul jaǵdaidyń múmkin emes ekeni belgili", - dedi ol.
"Rejim aýysýy kerek pe?", - dep naqtylap surady tilshiler.
"Árine. Bul meniń ǵana pikirim emes, bul kópshiliktiń jáne halyqaralyq sarapshylardyń, onyń ishinde reseilik táýelsiz sarapshylardyń pikiri. Adamdar, reseilikter "Krym nash" degen mastyqtan tolyqtai aiyǵýy úshin jáne saldary jaily mán berip oilanýy úshin belgili bir ýaqyt kerek. Ýkrainaǵa úmit syilaityn belgiler de paida boldy. Reseide valiýtalyq ipoteka ieleriniń narazylyq qozǵalysy qarqyn alyp keledi, olar sherýlerde "Qyrymdy qaitaryp berińizder!" dep urandai bastapty. Bul adamdar valiýtalyq kreditterin bankterge qaitara almai otyrǵandyqtan úlken kedergige tirelip otyr. Bul problemalar sanktsiianyń kesirinen boldy", - dep málimdedi ol.
"Qyrymdy jaýlap alý" hronologiiasyn eske sala otyryp, ol oqiǵanyń 2014 jyldyń 20 aqpanynda bolǵanyn aitty. "Bul kúni reseilik qarýly kúshter Reseidiń ózinen jáne Reseidiń Qyrymda Qara teńiz flotyndaǵy bazalarynda bolǵan áskeri Qyrym jartyaralyna basyp kirdi", - dedi Iýrii Lazebnik.
Sonymen qatar, ol bul hronologiiany barlyǵynyń da biletinin jáne bul máselede Ýkraina men Reseidiń qarama-qaishylyqtary joq ekenin atap ótti.
"Sońyra kelgende reseilik basshylyq óz qarýly kúshteriniń qajetti qural-jabdyqtar men arnaiy formalardy áskeri dúkennen satyp alǵanyn, eshqandai da qorǵanys jasaqtarynyń bolmaǵanyn moiyndady. 20 aqpanda basqynshyly bastaldy, 27 aqpanda reseilik arnaiy jasaq Qyrymnyń joǵarǵy keńesiniń ǵimaratyn basyp aldy. Reseilik arnaiy jasaqtyń baqylaýynda Qyrymnyń Joǵarǵy keńesiniń depýtatary referendým ótkizýge daýys berdi. OL 16 naýryzda ótip, osy árekettiń qorytyndy retinde Resei Qyrymdy óz quramyna qosyp aldy", - dep qorytyndylady Ýkrainanyń Qazaqstandaǵy ýaqytsha senimdi ókili Iýrii Lazebnik.
Derekózi:http://kaz.tengrinews.kz/world_news/reseylkter-kryim-nash-degen-mastyiktan-aryiluyi-kerek-268152/
