"Demos" qoǵamdyq uiymynyń jetekshisi Turarbek Qusaiynov Ýkraina halqynyń táýelsizdik jolyndaǵy kúresin qoldaý maqsatynda Aleksandr Matsievskiidiń monýmentin jasatty, dep habarlaidy Dalanews.kz.
“Qurmetti azamattar! Sizderge qazirgi qiyn kezeńde ýkrain halqynyń batyrlyǵy men erligine degen úlken qurmetimdi bildire otyryp, mańyzdy bastamamen júginip otyrmyn.
Qazaqstandyq belgili dissident Vladimir Kozlovtyń bastamasymen, men óz qarajatym esebinen Ýkrainanyń batyry Aleksandr Matsievskiige arnap monýment jasattym. Bul eskertkish erkindik pen ádildik týyn biik ustaǵandarǵa adaldyq pen tabandylyqty beineleidi. Ol ýkrain halqynyń egemendik pen táýelsizdik jolyndaǵy kúresin qoldaý maqsatynda jasaldy”, - deidi ol.
Aitýynsha, Matsievkiidiń eskertkishi eki el arasyndaǵy qarym-qatynasty nyǵaita túspek.
“Bul eskertkish - Qazaqstan men Ýkraina halqy úshin erkindiktiń qunyn túsindiretin mańyzdy nyshan bolatynyna senemin. Buǵan deiin men Qazaqstannyń birneshe qalasynyń basshylyǵyna eskertkishti qoǵamdyq oryndardyń birine ornatýdy, tipti keńestik partiia qyzmetkerleriniń atyndaǵy kóshelerdiń birin Aleksandr Matsievkiidiń atyna aýystyrý týraly usynys bildirgen bolatynmyn. Ókinishke qarai, usynysym men bastamalarym qoldaý tappady. Degenmen bul meniń tabandylyǵymdy tunshyqtyryp qoiǵan joq”, - dep atap ótti Qusaiynov.
Osy tusta ol Qazaqstandaǵy Ýkraina elshiligine eskertkishti syiǵa tartqysy keletinin habarlady.
“Meniń oiymsha, batyrlar týraly estelik búkil adamzat úshin mańyzdy bolyp qala bermek jáne ony máńgi este saqtaý qajet dep sanaimyn. Osyǵan bailanysty, men daiyn turǵan Aleksandr Matsievkiidiń músinin búkil qazaq halqynyń atynan Qazaqstandaǵy Ýkraina Elshiligine syiǵa tartqym keledi.
Bul nyshan qazaq halqynyń ýkrain halqyna degen shynaiy qoldaýyn bildiredi jáne eki el arasyndaǵy dostyq qarym-qatynasty nyǵaitady dep senemin.
Sizderden osy syidy qabyldaýǵa jáne ony elshilik aýmaǵynda nemese ózderińiz laiyq dep tapqan basqa orynǵa ornalastyrýlaryńyzdy suraimyn. Bul monýment erkindik pen beibitshilik úshin kúrestiń nyshanyna ainalyp, eki el arasyndaǵy mańyzdy mádeni bailanys bolady dep senemin”, - dedi ol.
Onyń sózinshe, Help to Ukraine Almaty Ýkrainaǵa gýmanitarlyq kómek kórsetý shtabynyń qoldaýymen bul eskertkish ýaqytsha Gýrilev kóshesi, 106A mekenjaiyndaǵy shtabta saqtalýda.
