Májilis depýtaty Abzal Quspan premer-ministr Oljas Bektenovke depýtattyq saýal joldap, mańyzdy máseleni kóterdi, – dep habarlaidy Dalanews.kz.
Depýtatyń pikirinshe, Qazaqstannyń keń dalasy – tek ulttyq bailyǵymyz emes, sonymen qatar, jahandyq ekojúieniń ajyramas bóligi.
"Degenmen tabiǵi tepe-teńdikti saqtaý jolynda Úkimettiń áreketsizdigi aýyl sharýashylyǵyna orny tolmas ziian keltirip otyr.
Memleket basshysy Ulttyq quryltaida kiik popýliatsiiasynyń kúrt ósýi aýyl sharýashylyǵyna keri áser etip, ekojúiege artyq salmaq túsirip jatqanyn atap ótti. Bul másele bir kúnde paida bolǵan joq – aimaqtardan atqarýshy bilikke joldanǵan júzdegen ótinish pen talap-aryz Úkimet tarapynan jyldar boiy eleýsiz qalyp keledi", - dedi Abzal Quspan.
Onyń aitýynsha, 2023 jyly BUU janyndaǵy Jabaiy janýarlardyń qonys aýdaratyn túrleri komitetiniń (CMS) sarapshylary arnaiy kelip, Batys Qazaqstan oblysynyń aýdandaryn aralaǵan. Zertteý nátijesinde QR Úkimetine naqty usynystar jasalǵan, olardyń bastysy – jergilikti halyq pen kiik arasyndaǵy qaqtyǵysty sheshý.
"Alaida Úkimet kúni búgin bul usynystardy oryndaý boiynsha naqty bir is-áreketke kóshken joq", - dep synady depýtat.
Abzal Quspan Úkimetke mynadai talap qoidy:
- Kiik popýliatsiiasyn retteý boiynsha naqty sharalar qabyldaýdy, atap aitqanda:
- Biyl kiik sanyn retteý jumystaryn júrgizý týraly resmi sheshim qabyldap, onyń ádisteri men ekologiialyq negizdemesin jariialaýdy;
- Kiik popýliatsiiasyn retteý boiynsha jaýapty bir memlekettik organdy belgileýdi jáne onyń naqty is-sharalaryn bekitýdi.
"Keńes Úkimeti kezinde kiiktiń eti de, terisi de paidaǵa asty, olardyń sany sońǵy kezdegidei kúrt ózgeristerge ushyraǵan joq, onyń basty sebebi – kiik úshin jaýapty naqty bir mekeme bolǵandyǵynda. Kiik ónimin halyq sharýashylyǵyna paidalanylýyn, azaiyp ketse de, kóbeiip ketse de jaýap beretin bir ǵana mekeme edi. Al qazir she? Kiikti qorǵaityn mekeme óz aldyna, al atýǵa litsenziiasy bar kez kelgen ańshyny quqyly qylyp qoidyńyzdar. Odan qala berdi, etin, terisin paidalanylýyn nemese ǵalymdarmen jumysty úilestirip otyratyn jaýapty naqty bir uiym, mekeme joq", - dedi depýtat.
- BUU komitetiniń usynystaryn oryndaýdy, onyń ishinde:
- CMS sarapshylarynyń 2023 jylǵy usynystaryn oryndaý boiynsha naqty jospardy bekitip, onyń oryndalý merzimderin belgileýdi;
- Usynystardyń qai bóligi júzege asatynyn jáne qaisysy eskerýsiz qalǵanyn resmi túrde túsindirýdi;
- Bul máseleni sheshýge qarastyrylǵan qarjyny jariialaýdy.
- Jaýapkershilik máselesi, naqty aitqanda:
- Kiik popýliatsiiasyn retteý boiynsha keshendi saiasat úshin jaýapty tulǵalardy belgilep, olardyń esebin tyńdaýdy;
- Ministrlikter arasyndaǵy úilestirý jumystaryn kúsheitip, atalǵan másele boiynsha naqty jaýapkershilik júkteýdi;
- Aýyl sharýashylyǵyna kelgen zalaldy óteý mehanizmin ázirlep, onyń iske asý tetikterin jariialaýdy.
"Aýyl sharýashylyǵy men ekologiianyń tepe-teńdigin saqtaý – Úkimettiń strategiialyq mindeti. Biraq bul salada júiesizdik, salǵyrttyq pen nemquraidylyq beleń alǵan. Memlekettik organdar halyqtyń, aýyl sharýashylyǵy taýar óndirýshileriniń talaptaryna, halyqaralyq uiymdardyń usynystaryna qulaq asatyn ýaqyt jetti", - dep túiindedi ol.
