Premer-Ministr Oljas Bektenov Munaily aýdanynynyń Besshoqy aýylynda balalardyń ýlanýyna bailanysty Densaýlyq saqtaý, Oqý-aǵartý ministrleri men Mańǵystaý oblysy ákiminiń esepterin tyńdady, dep habarlaidy Dalanews.kz.
Resmi málimetterge súiensek, búginde 460 bala dárigerlerdiń baqylaýynda. Olardyń 83-i aýrýhanada em qabyldap jatyr. Zardap shekkenderdiń, onyń ishinde jansaqtaý bólimindegi 2 balanyń jaǵdaiy turaqty. Densaýlyǵynyń jaqsarýyna bailanysty jansaqtaý bóliminde jatqan eki bala jalpy bólimshege aýystyryldy.
"Qazirgi ýaqytta aýrýhanaǵa ýlaný belgilerimen túsken balalardyń barlyǵyna tolyq kólemde qajetti meditsinalyq kómek, sonyń ishinde psihologiialyq kómek kórsetilýde. Oqiǵa ornynda Oqý-aǵartý ministrligi Balalardyń quqyqtaryn qorǵaý komitetiniń ókilderi jumys istep jatyr. Zardap shekkenderge jáne olardyń otbasylaryna qoldaý sharalaryn kórsetý boiynsha jumystar júrgizilýde. Táýlik boiy shtab jumys isteidi",—dep jazdy Úkimettiń baspasóz qyzmeti.
Aýrý oshaǵyn oqshaýlaý jáne joiý sharalaryn kúsheitý úshin óńirge "Qoǵamdyq densaýlyq saqtaý ulttyq ortalyǵy" ShJQ RMK "Sanitariialyq-epidemiologiialyq saraptama jáne monitoring ǵylymi-praktikalyq ortalyǵy" filialynyń mamandary jiberildi.
Úkimet basshysynyń tapsyrmasy boiynsha bir ai ishinde respýblikadaǵy barlyq mekteptiń ashanasynda sanitariialyq-epidemiologiialyq talaptardyń saqtalýyna bailanysty monitoring júrgiziledi. Ol mekteptegi tamaqtanýdyń qaýipsizdigin qamtamasyz etýge jáne jaisyz jaǵdailardyń qaitalanýyna jol bermeý sharalaryn kúsheitýge baǵyttalǵan.
Eske salaiyq, buǵan deiin balalar ish aýrýy men dene qyzýyna shaǵymdanyp, dárigerdiń kómegine júgingen edi.
"Munaily aýdanynda №8 mekteptiń 21 oqýshysy 6 qyrkúiek kúni keshki mezgilden bastap jedel járdem shaqyryp bastaǵan. Shaǵymdary: ish aýrýy, dene qyzýynyń kóterilýi. Búgingi kúni, saǵat 13:15-tegi jaǵdai boiynsha 58 bala meditsinalyq kómekke júgindi. 26 bala emhanada em qabyldap jatyr, 27 bala úi jaǵdaiynda baqylaýda, 5 bala aýrýhanaǵa jatqyzyldy", - dedi oblystyq densaýlyq saqtaý basqarmasynyń baspasóz hatshysy Móldir Ádil.
