Parlamenttiń ótken sessiiasynda men Áleýmettik-kásipkerlik korporatsiiasynyń (ÁKK) saýda ortalyqtary arqyly azyq-túlik taýarlarynyń baǵasyn retteý jumysynyń tiimsizdigin aityp, birneshe ret depýtattyq saýal jibergem.
Jýyrda bul jumysta ne ózgergenin bilmek bolyp, Nur-Sultan qalasynyń ÁKK-nyń jumysymen tanystym. Is júzinde kóńil kónshitetin ózgeris joq. "Baiaǵy jartas – sol jartas" deýge bolady.
Joldanǵan saýaldar óz sheshimin tappaǵan. Máselen,
- Saýda ortalyqtaryn irikteý qaǵidaty túsiniksiz, sebebi birneshe saýda ortalyqtarynyń ishinen tek keibir tańdaýlylary ǵana irikteledi;
- Azyq-túlik taýarlaryna baǵanyń aitarlyqtai qubylmalylyǵy kezinde tek maýsymdar boiynsha ǵana emes, jyldar boiynsha da olardyń eń tómengi shegin aldyn ala boljaý qiyn;
- Eger azyq-túliktiń jekelegen túrleriniń turaqtandyrý qoryndaǵy kólemi qala turǵyndarynyń eń tómengi tutyný normasynyń 0,01-7 paiyzyn ǵana qurasa, naryqty retteý týraly ne aitýǵa bolady?
- Mundai shema kezinde saýda ortalyqtary tek otandyq aýyl sharýashylyǵy taýarlaryn óndirýshilerden satyp alýdy júrgizýge mindetti emes, basqasha aitqanda, qazaqstandyq fermerler óz ónimderin sata almaidy, al biýdjet qarajaty sheteldik fermerlerdi qarjylandyrýǵa jumsalýy múmkin;
- Turaqtandyrýdyń mundai tetigi «baǵany retteýge barynsha pármendi, biýdjet qarajatyn paidalanýdyń tiimdiligin arttyrady» degen senimimizdi aqtamaidy, onda sybailas jemqorlyqtyń kórinisteri bar" degen edik.
Tipti, men aitqan osyndai máselelerdiń ústine qosylǵan jańa suraqtar bar.
Mysaly, 2011 jyly Úkimet áleýmettik mańyzy bar azyq-túlik túrleriniń 30 túriniń baǵasyn rettep otyratyn, al qazir tek 19 (!) túrin baqylaýǵa qaýqarly.
Áleýmettik-kásipkerlik korporatsiiasy saýda ortalyqtaryndaǵy baǵalarǵa aptasyna bir ret qana monitoring júrgizedi eken. Sonda basqa kúnderi azyq-túlik baǵasyn kim baqylaidy?
Saýda ortalyqtarynda áleýmettik mańyzy bar (iaǵni, arzandatylǵan) taýarlar jeke sórelerge ornalastyrylmaidy. Nelikten?
Qysqasyn aitsam, mende jaýaptan góri suraqtar kóbeidi....
Al biylǵy qurǵaqshylyqtan keiin jáne baǵalardy Áleýmettik-kásipkerlik korporatsiiasynyń osyndai deńgeidegi retteýimen kúzde, qysta jáne kóktemde qarapaiym halyqtyń jaǵdaiy ne bolmaq?
Aqylbek Kúrishbaev,
QR Parlamenti Senatynyń depýtaty
