Qaraǵandy turǵyny Almatyda ótken kontsertke paidalanylmaǵan biletiniń qunyn qaitarýdy jáne moraldyq ziian úshin ótemaqy óndirýdi talap etip, sotqa júgindi. Alaida sot onyń talabyn qanaǵattandyrmady, dep habarlaidy dalanews.kz.
Qaraǵandy qalasy Qazybek bi aýdanynyń №2 aýdandyq sotynyń baspasóz qyzmetiniń málimetinshe, áiel 2025 jylǵy 21 maýsymda Almatyda ótken kontsertke úsh bilet satyp alǵan.
Kontsert qarsańynda ol týysynyń jaraqat alýyna bailanysty bir bilettiń aqshasyn qaitarýdy surap, uiymdastyrýshyǵa júgingen. Alaida ótinishi qanaǵattandyrylmaǵan.
Osydan keiin áiel kontsert uiymdastyrýshysyna qarsy sotqa talap aryz túsirip, bilet quny retinde 40 myń teńge jáne moraldyq ziian úshin 15 myń teńge ótemaqy óndirýdi talap etken.
Sot materialdaryn zerdeleý barysynda týysynyń jaraqat alýy biletti talap qoiýshynyń ózi nemese basqa adam paidalana almaitynyn dáleldemeitini anyqtalǵan. Sondyqtan uiymdastyrýshyǵa bilet qunyn qaitarý mindetin júkteýge negiz joq degen sheshim qabyldanǵan.
Jaýapker talap aryzdy moiyndamaǵan. Onyń ókili kontserttiń ótkenin jáne biletti qaitarý týraly ótinish belgilengen merzimdi buza otyryp berilgenin alǵa tartqan.
Sottyń túsindirýinshe, jaýapker uiymdastyrǵan oiyn-saýyq is-sharalarynda tutynýshylardyń minez-qulyq qaǵidalarynyń 14-tarmaǵyna sáikes, kontsertke úsh jumys kúninen az ýaqyt qalǵanda, sondai-aq is-shara kezinde jáne odan keiin biletter qaitarylmaidy.
Alaida tutynýshy aýyrǵan nemese onyń otbasy múshesi ne jaqyn týysy qaitys bolǵan jaǵdaida erekshelik qarastyrylǵan.
Birinshi satydaǵy sot áieldiń talabyn qanaǵattandyrýdan bas tartqan.
Bul sheshimmen kelispegen talap qoiýshy apelliatsiialyq shaǵym túsirgen. Alaida Qaraǵandy oblystyq sotynyń azamattyq ister jónindegi sot alqasy alǵashqy sot sheshimin ózgerissiz qaldyryp, apelliatsiialyq shaǵymdy qanaǵattandyrmady.
