Quramynda Qazaqstannyń halyq sýretshisi Erbolat Tólepbaı, QR Sáýletshiler Odaǵynyń vıse-prezıdenti Baqytjan Áshirbaev, oblystyq sáýlet jáne qala qurylysy basqarmasynyń basshysy Erkin Júsipov jáne oblystyq qurylys basqarmasynyń basshysy Toqtar Úsibalıev syndy birqatar azamattar bar jumys toby Túrkistan qalasynyń bas josparynda qamtylatyn nysandardyń ornalasý tártibi, sáýlettik kelbetiniń erekshelikterimen tanysty.
Úsh baǵyt boıynsha, atap aıtqanda, Q.A.Iassaýı mavzoleıi men «Áziret Sultan» memlekettik qoryq murajaıynyń mańynda salynatyn qurylys nysandary, sonymen birge, ákimshilik-iskerlik ortalyǵyn salý baǵyttary boıynsha damıtyn oblys ortalyǵyndaǵy jobalardyń naqty ornalasý oryndaryn talqylaǵan mamandar búgingi kezdesýde atalǵan jumystarǵa qosymsha Túrkistan qalasyndaǵy joldardy da retteýdi josparǵa qosty. Osy oraıda, belgili sáýletshiler shaharda aınalma joldar salyp, qalanyń ınfraqurylymyn damytýdy jáne sáýletin odan ári kórkeıtýdi kózdep otyr.
Jalpy, atqarylyp jatqan jumystardyń barysyna kóńili tolǵan óńir basshysy oblystyq sáýlet jáne qala qurylysy basqarmasynyń basshysy E.Júsipovke sáýlettik jumystardy halyqaralyq deńgeıdegideı sapaly etip daıyndap, merziminde tapsyrýdy júktedi. Halyqaralyq konkýrsta jarıalanǵan ǵımarattardyń ornalasý jobasyn qarap, pikirimen bólisti.
Aıta ketý kerek, búgingi tańda Túrkistanda uzyndyǵy 764 shaqyrymdy quraıtyn 875 kóshe, "Batys Eýropa-Batys Qytaı" dálizi aıasynda salynyp, qalaǵa tıesili bolǵan 12 shaqyrymdyq bir ǵana aınalma jol bar.
Túrkistan shaharyn damytý týraly tujyrymdamanyń basty maqsaty - tarıhı-mádenı jáne rýhanı muranyń saqtalýyn qamtamasyz etetin túrki áleminiń ortalyǵy retinde qalany odan ári damytýdyń negizgi baǵyttaryn aıqyndaý, sondaı-aq Túrkistandy mańyzdy óńirlik damý ortalyǵy etip qalyptastyrý bolyp tabylady. Naqtyraq tarqatsaq, onda shahardyń halyqaralyq, týrısik jáne óńirlik turǵydan perspektıvalary aıqyndalyp, qalanyń áleýmettik-ekonomıkalyq áleýeti, onyń aýmaǵynyń josparly uıymdastyrylýy, qala qurylysy aımaqtaryna bólinýi syndy mańyzdy máseleler qaralǵan.
Túrkistan oblysy ákiminiń baspasóz qyzmeti
