Sońǵy 5 jylda qalaǵa tartylǵan investitsiianyń kólemi 8,5 esege ósip, byltyr 304 mlrd. teńgeni qurady. Biyl qala ekonomikasyna 350 mlrd. teńge investitsiia tartý josparlanyp otyr. Turǵyndarmen kezdesýde Darhan Satybaldy atqarylǵan jumystarǵa toqtaldy, aldaǵy jobalardy júzege asyrýda eldiń pikiri mańyzdy ekenin jetkizdi.
– Memleket basshylyǵynyń qoldaýymen 4 jarym jylda Túrkistan oblysynda aýqymdy jumystar atqarylyp, jobalar júzege asty. Ony kórip, bilip júrsizder. Degenmen oblys halqynyń 80 paiyzy aýyldarda turady. Sondyqtan biz aldaǵy ýaqytta aýyldardy damytýǵa da basymdyq beremiz. Al Túrkistandy damytý jumysy óz jalǵasyn tabady. Indýstrialdy aimaqty jáne arnaiy ekonomikalyq aimaqtyń jumysyn kúsheitemiz. Óndiris oryndaryn kóbeitý arqyly ǵana el áleýeti artady. Biz kelisip alýymyz kerek. Birinshi elge ne kerek? Aýyz sý ma, álde áleýmettik nysan ba? Birinshi kezekte tez sheshýdi talap etetin máseleler sheshilýi kerek. Bul rette sizderdiń pikirlerińiz mańyzdy. Osyndai kezdesýlerdegi usynystar tolyq zerdelenedi, – dedi Darhan Satybaldy.
– Biz bilim salasyn damytýǵa basymdyq berip otyrmyz. Osy sala rettelip, bilimdi jastar ósse, ózge máseleler de sheshiledi, – degen óńir basshysy basqa da jumystarǵa toqtaldy.
Halyqtyń tabysyn arttyrý maqsatynda arnaiy jumyspen qamtý kartasy bekitilip, Túrkistan qalasy boiynsha byltyr 2,5 myń jańa jumys orny ashyldy. Onyń 675-i – turaqty jumys.
Túrkistan qalasyndaǵy halyqaralyq áýejaidan byltyr Ystambýl jáne Kýveit baǵytyna tikelei reister ashyldy. Qazirgi ýaqytta Máskeý, Antalia, Dýbai, Tbilisi, Tashkent jáne Samarqandqa reister ashýǵa usynys berilgen. Astana men Almatyǵa reister sanyn kóbeitý boiynsha jumystar atqarylyp jatyr. Osy jumystar nátijesinde 2018 jylmen salystyrǵanda Túrkistanǵa kelýshiler men týrister sany 4 ese artqan.
