Ernar Nuralyulynyń sózinshe, óńir boiynsha 2,5 paiyzben nesie alý úshin búginge deiin 636 jas qujat tapsyrǵan. Onyń 434-i komissiiaǵa usynylyp, 243 úmitkerdiń biznes-ideialary qaralǵan. Nátijesinde, 142 jastyń jobasy maquldanyp, 62 jasqa qarajat aýdarý jumystary júrgizilip jatyr, 80 jasqa kásibin júrgizý úshin qarajat berildi. Al qalǵan 101 úmitkerge nesie berý talaptaryna sai kelmeýine bailanysty oń qorytyndy berilmegen.
– Nesieler «Agrarlyq kredittik korporatsiiasy» arqyly beriledi. Óńir boiynsha Qazyǵurt, Otyrar, Saryaǵash, Túlkibas, Ordabasy aýdandarynyń jastary memlekettik baǵdarlamaǵa ótinim berý boiynsha aldyńǵy qatarda tur. Al Sozaq, Maqtaaral, Báidibek, Keles, Saýran aýdandary men Kentaý, Túrkistan qalalarynda belsendilik tómen. Sondai-aq, Jetisai, Sairam, Tólebi, Shardara aýdandary men Arys qalasyndaǵy jumystar orta deńgeide, – dedi Ernar Nuralyuly.
Al Túrkistan oblysy boiynsha «Agrarlyq nesie korporatsiiasy» AQ filialynyń Nesieleý boiynsha direktorynyń orynbasary Álibek Imashevtiń aitýynsha, nesie mal sharýashylyǵy salasyndaǵy jobalar úshin – 7 jylǵa deiin, basqa baǵyttar úshin – 5 jylǵa deiin beriledi.
– Nesie alýshylardyń jasy 21-den 35-ke deiin jáne jeke kásipker retinde tirkelýi tiis. Úmitkerdiń jasy qujat tapsyrý sátinde eskeriledi. Taǵy bir aita keterligi, joba sheńberinde kepildik qoiý – basty talaptardyń biri. Úmitkerlerde kepil bolmasa, úshinshi tarap kepilger bola alady. Joba qabyldanyp, nesie alatyn kezde kepilgerdiń senimhaty men ózi mindetti túrde bolýy tiis. Sondai-aq, turǵylyqty jeri boiynsha Túrkistan oblysynda tirkelip, al kepilge qoiatyn múlki basqa óńirde ornalasýyna ruqsat beriledi. Kepilge jyljymaityn múlikten basqa menshiktegi aýyl sharýashylyq maqsattaǵy jerler nemese arnaýly tehnika qabyldanady. Ótinim berý úshin qujattar paketin «Agrarlyq nesie korporatsiiasy» AQ filialyna tapsyrý qajet, - dedi Álibek Qoishybaiuly.
Jastarǵa arnalǵan 2,5 paiyzdyq shaǵyn nesiege qujat qabyldaý naýryz aiynda bastalǵan bolatyn. Jospar boiynsha, Túrkistan oblysynda 594 jas memlekettik baǵdarlamaǵa qol jetkizýi tiis. Túrkistan oblysynyń ákimdigi men atalǵan jaýapty basqarma baǵdarlamany iske asyrýǵa 2,9 mlrd. teńge qarajat bólingenin málimdegen edi.
Eske sala ketsek, qazirgi tańda Túrkistan oblysyna qarasty aýdan, qalalyq «Jastar resýrstyq ortalyǵy» KMM-men birlesip Halyqty jumyspen qamtý ortalyǵy mamandary memlekettik baǵdarlamalar boiynsha aqparattyq-túsindirme jumystaryn júrgizip jatyr. Bul baǵyttaǵy kezdesýler men nasihattaý jumystary jyldyń sońyna deiin jalǵaspaq.
