Oblystyq politsiia departamenti tergeý basqarmasynyń bastyǵy Nurmahan Jalǵasovtyń aitýynsha, tergeý jumystarynyń aiasynda kúdiktiniń iske qatysy bar ekeni dáleldengen.
"Ýly gazdan bir otbasynyń bes birdei múshesi qaza bolyp, bizdiń oblysta úlken rezonans týdyrdy. Túrkistan oblysy tergeý basqarmasymen atalǵan jaitqa bailanysty QR QK-niń 306-baby (Qaýipsizdik talaptaryna sai kelmeitin taýarlardy shyǵarý nemese satý, jumystardy oryndaý ne qyzmetterdi kórsetý) boiynsha sotqa deiingi tergeý áreketteri júrgizilýde.
Búgingi tańda bul qylmysty jasady degen kúdiktilerdiń biri Túrkistan qalasynyń turǵyny ustaldy. Ol gaz ornatý firmalarynyń birinde direktor.
Tiianaqty júrgizilgen tergeý jumystarynyń aiasynda onyń iske qatysy bar ekeni dáleldendi. Biz kúdiktiler sanynyń artýyn joqqa shyǵarmaimyz. Sondyqtan tergeý jalǵasady" , – dedi Nurmahan Jalǵasov.
Aqpan aiynyń sońynda Túrkistan qalasyndaǵy jer úilerdiń birinde bes adam – áiel men onyń tórt balasy qaza tapqan. Barlyǵy gazdan ýlanyp qalǵan.
2004, 2006, 2013 jáne 2016 jyly dúniege kelgen balalardyń qasynda anasy (1980 jyly týǵan) birge bolǵan. Iis tiip qalǵan beseýin kórshileri kórip, quzyrly oryndarǵa habar bergen.
Otbasy turyp jatqan jeke turǵyn úi ortalyqtan keletin gaz qubyryna qosylǵan. Balalardyń ákesi Shymkent qalasynda emdelip jatqan.
Azattyq dereginshe bul Qazaqstanda aqpan aiynda adam qazasyna sebep bolǵan alǵashqy oqys oqiǵa emes.
- 21 aqpan kúni Soltústik Qazaqstan oblysynyń ortalyǵy Petropavl qalasynda bes qabatty jataqhanada ornalasqan dámhananyń gaz ballony jarylyp, eki adam mert boldy, úsh kisi aýrýhanaǵa tústi.
- 19 aqpan kúni Jambyl oblysy Jańatas qalasyndaǵy kóp qabatty úidiń páterinen órt shyǵyp, bir úidiń bes balasy kóz jumdy.
- 18 aqpanǵa qaraǵan túni Qyzylorda qalasynda ýaqytsha baspana órtke oranyp, úide bolǵan bes balanyń kenjesi qazaǵa ushyrady. Qalǵan balalardy úide bolǵan anasy qutqaryp úlgergen.
