Búgin bul týraly Túrkistan oblysy Óńirlik komýnıkasıalar qyzmetinde ótken brıfıńte Memlekettik sáýlet-qurylys baqylaýy basqarma basshysynyń orynbasary Merlan Kerimjanov málim etti.
Onyń aıtýynsha, zańdyq normalar men talaptardy buza otyryp salynǵan ári nusqamalar talaptaryn oryndamaǵan 356 nysan tekserilip, zań aıasynda shara qoldanylǵan.
– Memlekettik búdjet esebinen salynýdaǵy qurylys nysandarynda 114 merdiger mekemesine jáne 14 jobalaýshy mekemege QR ákimshilik quqyq buzýshylyq týraly kodeksine sáıkes sharalar kórilip, jalpy quny - 15,6 mln. teńge aıyppul salyndy. Injınırıńtik qyzmet kórsetý talaptaryn buzyp oryndaǵan 19 tehnıkalyq qadaǵalaýshyǵa zańǵa sáıkes atestattaryn 6 aıǵa toqtatyp, 8,2 mln. teńge aıyppul salynǵan, – dedi Merlan Abdrahmanuly.
Budan bólek, aýdan, qalalar ákimdikterinen «qyzyl syzyqqa» ótip salynǵan nysandardy tekserý barysynda jergilikti ákimdikter tarapynan qurylys salýǵa jer telimin berý kezinde jol jıeginiń «qyzyl syzyǵyn» jáne sanıtarlyq qorǵaý aımaqtarynyń ara qashyqtyqtaryn saqtaý sıaqty talaptardyń buzylǵandyǵy anyqtalyp otyr.
Basqarma tarapynan monıtorıń júrgizý barysynda jáne aýdan, qala ákimdikteriniń hattary men jeke jáne zańdy tulǵalardyń aryzdary boıynsha oblys aýmaǵyndaǵy qurylys nysandaryn qadaǵalaý, tekserý arqyly zań buzýshylyqtarmen jumys júrgizilip jatqanyn habarlaımyz.
Túrkistan oblysy ákiminiń baspasóz qyzmeti
