Elbasy Nursultan Nazarbaevtyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýyndaǵy mindetterdi júzege asyrý joly talqylanǵan jiynǵa óńirdegi 30-ǵa jýyq belsendi úkimettik emes uiym ókilderi qatysty.
Jiyndy ashyp júrgizgen oblystyq ishki saiasat basqarmasynyń basshysy Beisenbai Tájibaev Elbasynyń biylǵy Joldaýynyń mańyzdylyǵyna toqtaldy.
«Keshe Elbasy N.Á.Nazarbaev Qazaqstan halqyna arnaǵan Joldaýynda halyq tabysyn ósirý, turmys sapasyn arttyrý, ómir súrýge jaily orta qalyptastyrý baǵytynda josparlaryn aityp, bilik tarmaqtaryna elmen etene jumys isteýdi tapsyrdy. Joldaýda aitylǵan maqsat-mindetterdi iske asyrýda azamattyq qoǵam ókilderine úlken senim artylady. Sondyqtan, búgin biz sizderdiń oi-pikirlerińizdi estip, birlesip jumys isteý jóninde Túrkistanda birinshi ret bas qosyp otyrmyz. Azamattyq qoǵamdy damytýda úkimettik emes uiymdardyń qosar úlesi mol. Ásirese, Túrkistan jańa oblys ortalyǵyna ainalǵandyqtan onyń áleýmettik-mádeni baǵytyn jańa deńgeige kóterýde sizderden tyń jobalar kútemiz», - dedi basqarma basshysy.
Sonymen qatar, «Atalar amanaty» qoǵamdyq birlestiginiń tóraǵasy Murat Bekbaev, «Chernobyl odaǵy» qoǵamdyq birlestiginiń tóraǵasy Baqytjan Áshirbaev, «Shapaǵat» múgedekterdiń qaiyrymdylyq qorynyń tóraǵasy Erkinbai Shaltan jáne «Túrkistan qalalyq UOS jáne eńbek ardagerler uiymy» qoǵamdyq birlestiginiń tóraǵasy Jarqynbek Qulbaiymbetov pen ózge de azamattar sóz sóilep, kóptegen máselelerdi ortaǵa saldy.
Atap aitsaq, Túrkistan qalasyndaǵy áleýmettik nysandarda múgedekterge arnalǵan pandýstardyń joqtyǵy, qoǵamdyq birlestikterge arnalǵan keńselerdiń óte tapshy ekendigi sóz boldy. Sondai-aq, áleýmettik tapsyrystardy ózge óńirdiń birlestikteri jeńip ketetini, múgedek jandardyń jumysqa ornalasýdaǵy qiyndyqtary, olarǵa qoldaý qajet ekeni aityldy.
Búginde Túrkistan oblysynda 738 qoǵamdyq birlestik tirkelgen. Onyń ishinde 577-si — úkimettik emes uiymdar. Óńirde ÚEU salasynda suhbat uiymdastyrý sheńberinde 35 suhbat alańy jumys istep tur. Oblystyq jáne 16 aýdandyq, qalalyq aqparattyq-resýrstyq ortalyq bar. Ákimdikter janyndaǵy keńester men komissiialarǵa ÚEU ókilderi engizilgen. Barlyq deńgeidegi keńester josparǵa sáikes jylyna 2 ret jiyn ótkizip, is-sharalardy baǵdarlaidy. Oblystyq basqarmalar men aýdan, qala ákimdikteri jylyna 2 ret azamattyq qoǵam institýttarymen atqarǵan jumystary týraly esep beredi.
Oblysta úkimettik emes uiymdarmen memlekettik áleýmettik tapsyrys boiynsha birneshe basqarma men aýdan, qala ákimdikteri jumys atqarady. Úkimettik emes uiymdarǵa arnalǵan áleýmettik-mańyzdy jobalardyń taqyryptary memlekettik baǵdarlamalardy júzege asyrýǵa jáne ár saladaǵy ózekti máselelerdiń aldyn alýǵa arnalǵan. Qazirgi tańda 72 zańdy tulǵa, onyń ishinde 45 úkimettik emes uiym men 27 biznes qurylymy engen «Túrkistan oblysy Azamattyq aliansy» qaýymdastyǵymen tyǵyz bailanysta jumys atqarylyp keledi. Sonymen qatar, aýyldyq jerlerdegi úkimettik emes uiymdardyń jumysyn shiratý jáne qoldaý maqsatynda oblystyń barlyq aýdan, qalalarynda aqparattyq internet-resýrstyq ortalyqtar ashylǵan.
Jiyndy qorytyndylaǵan B.Tájibaev ÚEU ókilderine belsendilikti arttyryp, Elbasy Joldaýynda aitylǵan mindetterdi birlesip atqarýǵa, Túrkistandy kórkeitýge úles qosýǵa shaqyrdy.
Osy kezdesýde aitylǵan usynystar men ótinishter hattamaǵa engizilip, tiisti jumystar qolǵa alynady.
Túrkistan oblysy ákiminiń baspasóz qyzmeti
