Búgin Túrkistandaǵy «Rámizder» alańynda 25 qazan – Respýblıka kúnine arnalǵan Memlekettik týdy kóterý rásimi ótti. Aldymen Qazaqstan Respýblıkasynyń Memlekettik gımni shyrqalyp, Kók baıraq jelbiredi. Saltanatty jıynǵa Túrkistan oblysynyń ákimi Darhan Satybaldy, el aǵalary, jastar, qala turǵyndary qatysty.
– Barshańyzdy Respýblıka kúnimen shyn júrekten quttyqtaımyn! Bul – elimizdegi eń mańyzdy mereke. Memleket basshysy Qasym-Jomart Toqaev İ Ulttyq quryltaıda Respýblıka kúnine ulttyq mereke mártebesin qaıtarý týraly bastama kóterdi. Bul bastamany halyq qoldady. Sebebi, onyń tarıhı máni bar. Bul – ult úshin janyn qurban etken batyr babalarymyzdyń tógilgen qany men eńbeginiń óteýi. Asyl analarymyzdyń aq tileginiń jemisi.
Sondyqtan azattyqtyń qadirin bilýimiz kerek. Jyl saıyn Respýblıka kúni Prezıdentimiz tý kóterý rásimin ótkizedi. Bul is-shara respýblıkanyń barlyq óńirinde óz jalǵasyn tabady. Mine, bıyl da osy maqsatta Túrkistan tórinde júzdesip turmyz. Búgingi mereke Respýblıkany qurýdaǵy tulǵalardyń eleýli eńbegin dáripteıtin, azat el ekenimizdi maqtan tutanyn kún ekenin esten shyǵarmaıyq.
Elimiz aman, jurtymyz tynysh bolsyn!
Kók baıraǵymyz árdaıym kókte jelbirep, elimizdiń mártebesi bıikteı bersin! – dedi oblys ákimi Darhan Satybaldy.
Respýblıka kúnine oraı Túrkistan qalasynda avto jáne velosherý uıymdastyryldy. Merekelik is-sharada konserttik baǵdarlama usynylyp, otanshyldyqty dáripteıtin ánder shyrqaldy. «Jańa lep» óner ujymy hor oryndady. Áskerı orkestr Eskendir Hasanǵalıevtiń «Atameken» ánin, al «Saryn» toby «Qazaqstanym» ánin shyrqady. «Aıdaı» bı ansambli men jastar fleshmob kórsetip, kópshilikke merekelik-patrıottyq kóńil-kúı syılady.
Túrkistan jurtshylyǵy mańyzdy merekeni joǵary deńgeıde atap ótip, memlekettik rámizder dáripteldi. Bir-birin merekemen quttyqtap, izgi tilekterin arnady.
Túrkistandaǵy tý tuǵyrdyń bıiktigi 62,5 metrdi quraıdy. Baıraqtyń eni 12 metr bolsa, uzyndyǵy – 24 metr.
Aıta keteıik, 1990 jyly 25 qazanda Qazaqstannyń memlekettik egemendigi týraly Deklarasıa qabyldandy. Atalǵan deklarasıa elimizdiń táýelsizdik alýyna jol ashqan mańyzdy qujat boldy.
Deklarasıada Qazaqstannyń táýelsiz memleket retindegi saıası-quqyqtyq negizderi, el aýmaǵynyń tutastyǵy jarıalandy. Qazaq halqynyń mádenıetin, dástúrin, tilin qaıta túletý, ulttyq bolmysty qalyptastyrý ári nyǵaıtý sıaqty memlekettik qaǵıdattar bekitilip, kópshilikke usynyldy. Osy deklarasıanyń arqasynda el táýelsizdiginiń negizi qalanǵan bolatyn.
