Búgin Túrkistan qalasyndaǵy «Farab» ǵylymi ámbebap kitaphanasynda Qazaqstannyń kórnekti jazýshysy, halyqaralyq «Alash» ádebi syilyǵynyń iegeri, klassik qalamger Marhabat Baiǵuttyń 80 jyldyǵyna arnalǵan «Maqamy bólek Marhabat Baiǵut» atty halyqaralyq simpoziým ótti, dep habarlaidy Dalanews.kz
Is-sharaǵa elimizdiń ár óńirinen jáne shet elderden belgili ǵalymdar, qalamgerler men qoǵam qairatkerleri qatysty. Qonaqtar aldymen arnaiy jasaqtalǵan kórmemen tanysty. Onda birtýar azamattyń jeke muraǵatynan jádigerler qoiylyp, kitaptary qoiylǵan.
Simpoziýmda QR Parlamenti Senatynyń depýtaty, akademik Darhan Qydyráli alǵash bolyp sóz alyp, QR Prezidenti Qasym-Jomart Toqaevtyń arnaiy quttyqtaýyn jetkizdi. Sonymen qatar QR Parlamenti Senatynyń Tóraǵasy Máýlen Áshimbaev pen QR Májilis Tóraǵasy Erlan Qoshanovtyń, sonymen qatar Qyzylorda, Jambyl oblysy ákimderiniń de quttyqtaýlary oqyldy. Túrkistan oblysy ákiminiń orynbasary Beisenbai Tájibaev arnaiy qatysyp, óńir basshysynyń quttyqtaýyn jetkizdi.
Baiandamashylar qatarynda alashtanýshy ǵalym Dihan Qamzabekuly, akademik Ońalbai Aiashev, Túrkiiadan kelgen professor Jámilá Kynajy sekildi ziialy qaýym ókilderi Marhabat Baiǵuttyń shyǵarmashylyǵy men qoǵamdyq qyzmeti týraly mazmundy oilarymen bólisti.
Simpoziým aiasynda jazýshy Nurǵali Orazdyń Marhabat Baiǵutqa arnalǵan jańa pesasynan Raiymbek Seitmetov atyndaǵy Túrkistan sazdy-drama teatrynyń ártisteri alǵash ret sahnalady. Sonymen qatar beinequttyqtaýlar usynylyp, jazýshy týraly derekti film kórsetildi.
Shara sońynda stýdent-jastar arasyndaǵy respýblikalyq shyǵarmashylyq baiqaý júldegerlerin qazylar alqasynyń tóraǵasy Ámirhan Meńdeke, oqýshylar arasyndaǵy «Marhabat oqýlary» oblystyq baiqaýynyń jeńimpazdaryn Túrkistan oblystyq mádeniet basqarmasynyń basshysy Ázimhan Qoilybaev marapattady. Is-sharadan soń qalamgerdiń quran oqylyp, as berildi.
Qazaq ádebieti men rýhaniiatyna súbeli úles qosqan qalamger Marhabat Baiǵuttyń ómir joly men shyǵarmashylyǵyna jasalǵan taǵzym, rýhani sabaqtastyqtyń jarqyn kórinisi ispetti. Úsh kúnge josparlanǵan mańyzdy shara Sozaq, Túlkibas aýdandarynda jalǵasady.
Aita keteiik, simpoziýmdy Túrkistan oblystyq Mádeniet basqarmasynyń qoldaýymen «Marhabat Baiǵutqa 80jyl» jobasynyń jetekshisi «Mediakratiia» qoǵamdyq birlestiginiń tóraǵasy Ǵalymjan Elshibai jáne Túrkistan oblystyq «Farab» ámbebap-ǵylymi kitaphanasy uiymdastyrǵan.
