Túrkistanda qiyn jaǵdaiǵa tap bolǵan kámeletke tolmaǵandarǵa quqyqtyq-psihologiialyq kómek kórsetetin ortalyq qyzmetin bastady. Onda psihologiialyq jáne quqyqtyq qoldaý kórsetiledi.
Túrkistan oblysy ákimi janyndaǵy áielder isteri jáne otbasylyq-demografiialyq saiasat jónindegi komissiianyń kezekti otyrysynda balalardyń panasyz jáne qadaǵalaýsyz qalýynyń aldyn alý men áielderdiń densaýlyǵyn qorǵaý týraly máseleler qozǵaldy.
Otbasy-turmystyq qatynastar salasyndaǵy qylmystar týraly da aityldy.
Túrkistan oblystyq politsiia departamentiniń málimetine sáikes, qylmystyń aldyn alý maqsatynda politsiia tarapynan kóptegen sharalar uiymdastyrylýda. Tirkelgen qylmystardy saraptaǵan mamandar otbasyndaǵy janjaldyń oryn alýyna kóp jaǵdaida ishimdik sebep ekenin aitady. Sotqa joldanǵan is qujattardyń 64% eki jaqtyń tatýlasýyna bailanysty qysqartylǵan.
Oblys boiynsha bosaný jasyndaǵy áielder sany 444 myńnan asady. Onyń ishinde júkti áielder sany – 32 303. Jyl basynan beri 37 myńnan astam náreste dúniege kelgen. Áiel densaýlyǵyn jaqsartýǵa baǵyttalǵan barlyq jumystar júzege asyrylýda. Oblystyq qoǵamdyq densaýlyq basqarmasynyń málimetinshe, urpaqty bolýǵa qabiletsiz dep tanylǵan patsientterge ekstrakorporaldyq uryqtandyrý ádisteri usynylady. Biyl 670 kvota bólinip, 520 jup arnaiy meditsinalyq ortalyqtarǵa joldandy.
Ana ólim-jitimin tómendetý boiynsha sharalar kadrlyq qamtamasyz etý, materialdyq-tehnikalyq jaraqtandyrý, ekpe egý, kontratseptsiialaý, júktilikke aldyn-ala daiyndaý, tsifrlandyrý jáne aqparattyq-túsindirý jumystaryn qamtityn josparlar sheńberinde iske asyrylýda.
