Túrkistanda densaýlyq festivali ótti
Túrkistan oblysynda «Densaýlyq festivali» ulttyq baǵdarlamasyn iske asyrý sheńberinde «Densaýlyq festivali – 2018» aktsiiasy ótti.
Festivaldiń maqsaty – turǵyndardyń nazaryn belsendi ómir súrýge aýdaryp, densaýlyqtaryna jaýapkershilikpen qaraýdy nasihattaý. Is-shara tańǵy saǵat 08.00-de «Deni saýdyń – jany saý» uranymen jattyǵý jasaýmen bastalady. Oblys ortalyǵy Túrkistan qalasynda «Rámizder» alańynda tańǵy jattyǵý ótse, saǵat 09.00-den «Esimhan» alańyna deiin jaiaý marafon ótti.
Marafonǵa sportshylar, memlekettik qyzmetkerler, barlyq basqarma ókilderi, zeinetkerler, sportshylar, dárigerler, sarbazdar, muǵalimder, stýdentter men oqýshylar qatysty. Sonymen qatar, «Densaýlyq – zor bailyq» avtosherýi de jurtshylyqtyń kóńilin sergitti.
Festival barysynda Túrkistan oblysy ákiminiń orynbasary Erbol Tasjúrekov, Aziia oiyndarynyń chempiony Didar Hamza sóz sóilep, eldi sportpen shuǵyldanýǵa, densaýlyǵyna sergek qaraýǵa shaqyrdy. Túrkistan qalasynyń orta bilim beretin mektepteriniń oqýshylary «Paidaly taǵamdar» kórmesine qatysyp, ózderi daiyndaǵan ónimderin alyp keldi. Al, farmkompaniialar dári-dármekterin usynsa, oblystyq deneshynyqtyrý jáne sport basqarmasy sporttyń birneshe túrinen saiystar uiymdastyrdy.
«Meditsinalyq qalashyqtarda» oblys ortalyǵynyń turǵyndary men qonaqtary dárigerlerge tegin qaralyp, «densaýlyq sandaryn» (qandaǵy qant, holesterin deńgeii, AQ deńgeii jáne t.b.) anyqtaý úshin ekspress-analizder tapsyrdy. Dárigerler kelýshilerge salaýatty ómir salty ustaný boiynsha keńesterin berip, densaýlyqty saqtaý ár adamnyń mindeti ekenin jetkizdi.
Festival barysynda sporttyq jáne mádeni is-sharalar ótip, densaýlyqty saqtaý joldary túsindirildi. Mundai is-sharalar Túrkistan oblysynyń barlyq aýdan, qalalarynda uiymdastyryldy.
Túrkistan oblysy ákiminiń baspasóz qyzmeti
