Túrkistan oblysynda biýdjet qarajatyn jymqyrǵany úshin tabiǵatty qorǵaý mekemesiniń burynǵy basshysy men onyń sybailastaryna sot úkimi shyqty, dep habarlaidy Dalanews.kz.
QR Jemqorlyqqa qarsy is-qimyl agenttiginiń málimetinshe, oblystyq Tabiǵat paidalaný jáne tabiǵi resýrstar basqarmasyna qarasty «Jasyl aimaq» KMM-niń burynǵy direktory I. Begasilov, onyń orynbasary A. Ernazarov, mekemeniń zańgeri M. Ainabekova jáne kásipker I. Mýslimov biýdjet qarajatyn zańsyz igergeni úshin jaýapqa tartylǵan.
Olar tehnikalyq talaptarǵa sai kelmeitin arzan pestitsidter men gerbitsidterdi satyp alý arqyly memleketke 14,9 mln teńge zalal keltirgen.
Sot sheshimi:
I. Begasilov – 2 jyl 6 aiǵa bas bostandyǵynan aiyryldy.
A. Ernazarov, M. Ainabekova jáne I. Mýslimov – 2 jylǵa bas bostandyǵyn shekteý jazasyna kesildi.
Sonymen qatar sottalýshylar ómir boiyna memlekettik qyzmette jáne kvazimemlekettik sektorda jumys isteý quqyǵynan aiyryldy. Qazirgi ýaqytta sot úkimi zańdy kúshine engen joq.
