Dúbirli synǵa Qytai, Qyrǵyz respýblikasy, Ózbekstan, Tájikstan jáne Iemen memleketteri men elimizdiń barlyq óńirinen 160-qa jýyq sportshy keldi. Týrnirdiń ashylý saltanatynda Túrkistan oblysynyń ákimi Darhan Satybaldy qatysýshylar men sport jankúierlerin quttyqtady.
– Túrkistan tórindegi halyqaralyq týrnirge qosh keldińizder! Bokstan jastar arasyndaǵy bul jarys óńirimizde 20-shy ret ótkeli jatyr. El Prezidenti Qasym-Jomart Toqaev sport salasyn únemi qoldap keledi. Túrkistan oblysynda da sport salasyna úlken mán berilip, sport nysandary salyndy.
Qazirgi ýaqytta Túrkistan qalasynda Bekzat Sattarhanov atyndaǵy sport kesheni salynyp jatyr. Jańa qalanyń ákimshilik-iskerlik ortalyǵy aýmaǵynda «Tennis ortalyǵy» boi kóterdi. «Muz saraiy» men eskek esý kanaly salynýda. Túrkistan óńiri talai sport sańlaǵyn baptap shyǵardy. Onyń ishinde boks mektebimiz óte myqty. Solardyń biregeii Bekzat Sattarhanovty Qazaq eli eshqashan umytpaidy. Búgingi doda óńirdegi jas sportshylarǵa jańa serpin beredi dep senemin, – dedi Darhan Satybaldy.
Bekzattyń anasy Syrlykúl Sattarhanova, Olimpiada chempiondary – Ermahan Ibraimov pen Serik Sápiev te quttyqtaý sóz sóilep, jas sportshylarǵa sáttilik tiledi. Jarysqa Bekzattyń sport salasyndaǵy áriptesteri men dostarymen qatar elimizdegi boks sportynyń maitalmandary, keiingi býyn chempiondary arnaiy kelip, jastardyń deńgeiin saralaýda.
Túrkistan oblysynda 8 oblystyq, 18 qalalyq jáne 7 aýdandyq sport mektepterinde boks bólimderi jumys isteidi. Onda 252 jattyqtyrýshy 6277 sportshyny saiystarǵa daiyndap keledi.
