Jiynǵa «Nur Otan» partiiasy Túrkistan oblystyq filialy tóraǵasynyń birinshi orynbasary Beisen Tájibaev, Túrkistan qalasynyń ákimi Nurbol Turashbekov jáne óńirdiń belsendi jastary qatysty.
Sonymen birge Nur-Sultan qalasynan arnaiy kelgen QR Parlamenti Májilisiniń eń jas depýtaty Mádi Ahmetov pen «Jas Otan» jastar qanatynyń tóraǵasy Nurjan Jetpisbaev ta túrkistandyq jastardyń qýanyshyna qosyldy.
Jastarǵa «Coworking» ortalyǵynyń kiltin tapsyryp, quttyqtaǵan Beisen Tájibaev «Nur Otan» partiiasynyń sailaýaldy baǵdarlamasynda jastardy qoldaý, olardyń bilim alýyna, maman iesi atanýyna jaǵdai jasaý baǵytyndaǵy jumystarǵa barynsha basymdyq berilgenin aitty.
– Túrkistan kún sanap ósip-órkendep keledi. Shahardaǵy aýqymdy jobalar men alyp ǵimarattar jastar, iaǵni, sizder úshin salynyp jatyr. «Nur Otan» partiiasynyń Túrkistan qalalyq filialynyń janynan ashylǵan búgingi ortalyq jas býyn úshin jańa ideialar men bastamalardyń ordasyna ainalady dep senemin, – degen ol osy ortalyqty ashýǵa kómek kórsetken demeýshiler men partiia belsendilerine alǵysyn jetkizdi.
Ortalyqtyń qurylysy 2021 jyly naýryz aiynda jergilikti kásipkerler men depýtattardyń qoldaýymen bastaý aldy. Túrkistandaǵy «Jeńis» saiabaǵy mańynda ornalasqan bul ortalyq bir ýaqytta 50-70 adamǵa deiin qabyldai alady. Kólemi – 100 sharshy metr. «Coworking» ortalyǵy zaman talabyna sáikes jabdyqtalyp, ǵalamtor júiesimen qamtylǵan. Munda jastar úshin bos ýaqytty tiimdi paidalanyp qana qoimai, óz-ózderin jan-jaqty damytýǵa, partiia bastamalary men memlekettik mańyzy bar is-sharalar legin júzege asyrýǵa múmkindik mol. Kórikti saiabaq ishinde túrli formattaǵy is-sharalardy uiymdastyrýǵa jaǵdai jasalǵan. Túrkistandyq jastarǵa tegin qyzmet kórsetiledi.
Túrkistan qalasynyń ákimi Nurbol Turashbekov jastar saiasatyn qoldaý baǵytynda igi ister jalǵasatynyn, Túrkistan – jalyndy jastardyń qalasy ekenine toqtaldy.
«Jas Otan» jastar qanatynyń Túrkistan oblystyq filialynyń tóraǵasy, qalalyq máslihat depýtaty Janserik Juman jetekshi partiia tarapynan jas órenderdiń kadrlyq rezervke iligýine, jergilikti sailanbaly oryndarǵa sailanýyna qoldaý kórsetilip jatqanyn aita kele zamandastarynyń «Jastar – Otanǵa!» baǵdarlamasyn júzege asyrýǵa kúsh salatynyn jetkizdi.
