Búgin «Mádeni demalys qyzmeti jáne halyq shyǵarmashylyǵyn damytý» aptalyq kýrsynyń sońǵy dárisi ótti. Jas mamandarǵa bir apta boiy biliktiligin arttyrý maqsatynda túrli taqyrypta arnaiy spikerler sheberlik saǵatyn ótkizdi, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Kýrstyń alǵashqy dárisin M.Áýezov atyndaǵy Ońtústik Qazaqstan ýniversitetiniń «Mádeni jáne áleýmettik jumys» kafedrasynyń aǵa oqytýshysy, «Format E» mádeni damý oqý-ádistemelik ortalyǵynyń direktory Erlan Áýesbaev, «Mádeni tynyǵý jumysynyń teoriiasy men tájiribesi» taqyryby aiasynda keńinen toqtalyp, túrli taqyrypqa sai oiyndar uiymdastyrdy. Qatysýshylar bir-birimen pikir almasyp, spikerge suraqtaryn qoidy.
Al ekinshi kúninde Jambyl oblystyq halyq shyǵarmashylyǵy ortalyǵynyń bas rejisseri Nuraly Abdýllaev kýrs qatysýshylaryna «Aýyldyq mádeniet úileri men klýbtardaǵy úiirmeler men memlekettik jáne qoǵamdyq is-sharalardy uiymdastyrýdyń jańa strategiiasy» taqyrybynda dáris ótkizdi.
Jas mamandardyń biliktiligin arttyrýǵa baǵyttalǵan atalmysh kýrstyń úshinshi kúninde M.Áýezov atyndaǵy Ońtústik Qazaqstan ýniversitetiniń «Mádeni jáne áleýmettik jumys» kafedrasynyń aǵa oqytýshysy Elmira Ábsamatova «Mádeni tynyǵý mekemelerinde sahna tili tehnikasyn qalyptastyrý» taqyrybyn keńinen qozǵap, kýrs qatysýshylarymen birge taqyrypqa sai arnaiy jattyǵýlardy jasady. Qatysýshylar teoriialyq baǵytta da bilimderin keńeite tústi. Sondai-aq, kókeikesti saýaldaryn qoiyp, arnaiy alǵan jaýapty qaǵazǵa túrtip otyrdy.
Sheberlik saǵattyń tórtinshi kúni oblystyq «Farab» ámbebap-ǵylymi kitaphanasynyń direktory Janat Shardarbekova kýrs qatysýshylaryn zamanaýi kitaphananyń ishimen tanystyryp, birge ekskýrsiia jasady.
Budan bólek, kitaphananyń «Kópshilik buqaralyq is-sharalar sektorynyń» meńgerýshisi Pernekúl Náltaeva «Halyqtyń bos ýaqytyn uiymdastyrý maqsatynda kitaphanalar men mádeniet úileri, klýbtardyń birlesip atqaratyn jumystary» taqyrybynda motivatsiialyq trening ótkizdi. Dáris barysynda túrli kreativti oiyndar uiymdastyrylyp, kýrs qatysýshylary Abaidyń ánderin birge shyrqady.
Sonymen qatar Oblystyq mádeniet jáne halyq shyǵarmashylyǵy ortalyǵynyń direktory Meiirjan Aliakbarov «Festivalder men baiqaýlardy, shoý kontsertterdi uiymdastyrýdyń jańa baǵyttary» taqyrybynda dáris ótip, qatysýshylarǵa arnaiy tapsyrmalar berdi.
Aptalyq kýrstyń qorytyndy kúninde Oblystyq mádeniet jáne halyq shyǵarmashylyǵy ortalyǵynyń kórkemdik jetekshisi Asylhan Temirhan «Mádeni demalys qyzmetin uiymdastyrý jáne halyq shyǵarmashylyǵyn damytýda mádeniet úileri men klýbtardyń mindetteri» týraly dáris ótkizip, barsha qatysýshylarǵa arnaiy sertifikat tabystady.
Aita keteiik, aptalyq kýrstyń maqsaty jas mamandardyń biliktiligin arttyrýǵa, halyq shyǵarmashylyǵyn damytýǵa baǵyttalǵan. 19-24 tamyz aralyǵynda ótken kýrsqa mádeniet jáne óner salasy boiynsha mamandyǵy ózge, jumysqa jańadan qabyldanǵan aýyldyq mádeniet úileriniń direktorlary men klýb meńgerýshileri jáne qyzmetkerleri qatysty.
Qatysýshylardyń pikirinshe, atalmysh kýrs joǵary deńgeide ótti. Jas mamandardyń biliktiligin arttyrýǵa baǵyttalǵan sheberlik saǵat, óz maqsatyn múltiksiz oryndady jáne osyndai baǵyttaǵy tájirbielik kýrs jii bolsa dep tilek bildirdi.
