Qazirgi tańda aýyl sharýashylyǵy taýar óndirýshilerine agrotehnologiiany tiimdi paidalanýǵa keńes berý, ziiankestermen kúres sharalaryn úiretý, sharýalarǵa tuqym tańdaýǵa usynys berý arqyly jan-jaqty túsindirme jumystary júrgizilýde.
Himiialyq tyńaitqyshtardan bas tartyp, tolyq organikalyq tásilmen ónim alýdy, mal sharýashylyǵy salasynda joǵalyp bara jatqan iri qara mal genefondyn saqtap tuqymdyq quramyn jaqsartýdy kózdeitin kásipkerler palatasynyń pilottyq jobasy sharýalar úshin tiimdi.
Túrkistan oblysy kásipkerler palatasy direktorynyń orynbasary Nurbol Rysbekov oblys aýmaǵyndaǵy «Marǵulan» sharýa qojalyǵy men «Ramazan Agro» JShS-ne baryp, demonstratsiialyq alańdaryndaǵy ahýalmen tanysty.
Otyrar aýdany, Talapty eldi mekeninde ornalasqan «Marǵulan» sharýa qojalyǵy bazasyndaǵy 20 gektar alqapqa júgeri egilgen.
Sharýa qojalyǵynyń iesi Bekjan Ibashev jiyrma kún ishinde jiyn-terim jumystary bastalatyndyǵyn málimdedi. «Agro-keńes berý ortalyǵynyń» jetekshisi Nurlybek Boranbaevtyń aitýynsha, biyl sharýanyń «Pioner» sortty júgeri sobyǵynan mol ónim alýǵa múmkindigi joǵary.
Sebebi, demonstratsiialyq alańda daqyldardy agrotehnikalyq talaptardy saqtai otyryp organikalyq negizde ósirýge mańyz berý arqyly ónim alynady.
Ordabasy aýdany, Tórtkúl eldi mekenindegi «Ramazan Agro» JShS-niń menshiginde 723 gektar jer telimi bar. Onyń ishinde 65 gektar aýmaqtaǵy demonstratsiialyq alańǵa organikalyq negizde maqta egilgen. Sharýa qojalyǵynyń tóraǵasy Meiirhan Myrzabaiulynyń sózinshe, qazan aiynyń ortasynda maqta terimi bastalady. Alqaptaǵy «Edessa» maqta sortynan joǵary ónim alynady dep kútilýde.
