Aýdandyq ákim apparatynyń basshysy ózine qatysty is qozǵalǵannan keiin kóp uzamai jaǵdaiy nasharlaǵan, dep habarlaidy Dalanews.kz.
Óńirde taǵy 3 sheneýnikke qatysty sot úkimi shyqty. Oblystyq tsifrlandyrý basqarma basshysy orynbasarynyń mindetin atqarýshy birneshe ret para alǵany úshin sottaldy. Al basqarmanyń bólim basshysy para berýge jáne alaiaqtyq jasaýǵa itermelegeni úshin kináli dep tanyldy.
"Túrkistan oblysynda para aldy dep aiyptalǵan birneshe shendige qatysty sot úkimi shyqty. Olardyń biri áreketi áshkere bolǵan tusta-aq ózin nashar sezinip, jaǵdaiy qiyndaǵan. Naqtylai ketsek, Otyrar aýdany ákimi apparatynyń eks-basshysy memlekettik satyp alý sharttaryn túzip, oryndalǵan qyzmetter boiynsha baqylaýdy júzege asyratynyn eskertip, jalpy qamqorlyǵy úshin birneshe ret para alǵan. Resmi aqparat boiynsha, 2023 jyly kásipkerden 10 000 000 teńge somasynda para alǵan ony jedel ýákil qyzmetkerleri ustaǵan. Alaida sheneýnik ózine qatysty is qozǵalǵannan keiin kóp uzamai júregi toqtap, qaitys bolǵan", - dep jazylǵan basylym málimetinde.
"Túrkistan oblysynyń Otyrar aýdany boiynsha jalpy 21 konkýrs jariialanyp, Otyrar aýdany ákim apparatynyń basshysy M. satyp alý boiynsha konkýrstan jeńimpaz retinde I.-ǵa tiesili JShS-laryn tanýǵa jáne jalpy qamqorlyǵy úshin 5 000 000 teńge para alǵan. Memlekettik aiyptaýshy úsh adamǵa bas bostandyǵynan aiyrý jazasyn taǵaiyndaýdy jáne M. qaitys bolýyna bailanysty kináli dep tanyp, oǵan qatysty qylmystyq isti toqtatýdy surady", - delingen Shymkent qalasy qylmystyq ister jónindegi aýdanaralyq sotynyń baspasóz qyzmeti habarlamasynda.
Túrkistan oblysy Tsifrlandyrý basqarmasy basshysy orynbasarynyń mindetin atqarýshyǵa qatysty da sot úkimi shyqty. Ol QR QK-niń 366-baby 3-bóliginiń 4) tarmaǵymen birneshe ret para alý deregi boiynsha aiyptalǵan edi. Shymkent qalasynyń qylmystyq ister jónindegi aýdanaralyq soty shendige, sol basqarmanyń bólim basshysyna jáne para berdi degen kásipkerge qatysty úkim shyǵardy.
"2022 jylǵy tamyzdan 2023 jylǵy shildege deiingi kezeńde memlekettik organdardy aqparattandyrý jáne tsifrlandyrý jónindegi qyzmetterdi memlekettik satyp alý kelisimsharttaryn jasasqany, olar boiynsha atqarylǵan jumystardyń aktisine qol qoiý úshin jalpy somasy 14,6 million teńge bolatyn birneshe ret para alǵany jáne bergeni úshin, sonymen qatar Jolseiitov budan basqa para berýge jáne alaiaqtyq jasaýǵa itermelegeni úshin kináli dep tanyldy. Ol Tólebi aýdanynyń Tsifrlandyrý bóliminiń basshysy laýazymyna aýysqannan keiin osyndai áreketterdi oryndaǵany úshin joǵary turǵan laýazymdy tulǵalarǵa beremin degen syltaýymen Isakovtyń 903 myń teńge somasyndaǵy aqshalai qarajatyn alaiaqtyq jolmen iemdengeni anyqtaldy", - dedi QR Sybailas jemqorlyqqa qarsy is-qimyl agenttiginiń resmi ókili Daniiar Bigaidarov.
Sot Myrzaseiitovke 8 jyl, Isakovqa 7 jyl, Jolseiitovke 4 jyl merzimge bas bostandyǵynan aiyrý jazasyn taǵaiyndady. Olar memlekettik qyzmette laýazymdardy atqarý quqyǵynan ómir boiyna aiyryldy. Sonymen qatar sot Otyrar aýdany ákimi apparatynyń eks-basshysynyń ólimine bailanysty oǵan qatysty qylmystyq qýdalaýdy toqtatty.
Aita keteiik, úkim áli zańdy kúshine engen joq.
