Merekelik sharada alǵashqy bolyp sóz alǵan Túrkistan oblysynyń ákimi Janseiit Qanseiituly barlyq memlekettik qyzmetshilerdi kásibi merekemen quttyqtap, elimizdiń ósip, órkendeý jolynda tolaǵai tabystar tiledi.
– Dana halqymyzda «Biligi myqty eldiń – tirligi qutty bolady» degen sóz bar. Memlekettik qyzmetshiniń basty mindeti - týǵan Otany men halqyna adal qyzmet etýimen baǵalanady. Elbasymyz usynǵan Bes institýtsionaldyq reformada eń birinshi turǵan baǵyt memlekettik qyzmetti jańa deńgeige kóterý, iaǵni kásibi memlekettik apparat qurý máselesi qarastyrylǵan. Biyl memlekettik qyzmet isteri jónindegi ýákiletti organ – Memlekettik qyzmet isteri agenttiginiń qurylýyna 20 jyl tolyp otyr. Osy ýaqyt ishinde memlekettik qyzmet júiesi ýaqyt aǵymynyń talaptaryna sai qalyptasyp úlgerdi. Jalpy ult mártebesin kóteretin, el abyroiyn asqaqtatatyn memlekettik qyzmetker bolý – mártebeli mindet. Memlekettik qyzmetshi – biliktiń biik beinesin, iskerlik qabiletin kórsetedi. Oblysymyzdyń qarqyndy damýy Sizderdiń kásibi sheberlikterińizge, tájiribelerińizge, umtylystar men erik-jigerlerińizge tikelei bailanysty. Ulttyq ustanymmen memlekettik múddege qyzmet ete bereiik, – dedi oblys basshysy.
Saltanatty shara aiasynda memlekettik qyzmet salasynda kóp jyldar boiy úlgili qyzmet atqarǵan memlekettik qyzmetshilerge Oblys ákiminiń gramotalary, QR Memlekettik qyzmet isteri jáne sybailas jemqorlyqqa qarsy is-qimyl Agenttiginiń óńirdegi Departamenti basshysynyń arnaiy alǵys hattary tabystaldy.
Qazirgi tańda Túrkistan oblysyndaǵy 575 memlekettik organda 8700-den asa memlekettik qyzmetshi bar. Olardyń ortasha eńbek ótili 10 jyldan asady. Bul Elbasy josparynda aitylǵan reformalardy júzege asyratyn kásipqoilardyń ózegi mol ekenin kórsetedi.
Merekelik shara sońy kontserttik baǵdarlamaǵa ulasyp, kásibi mereke ielerine qurmet kórsetildi.
Túrkistan oblysy ákiminiń baspasóz qyzmeti
