Jalpy kórsetkishti 30 paıyzǵa jetkizý josparlanǵan. Bul týraly Túrkistan oblystyq óńirlik komýnıkasıalar qyzmetinde ótken brıfıńte Aqparattandyrý, memlekettik qyzmetter kórsetý jáne arhıvter basqarmasynyń basshysy Bastar Esqaraev málim etti.
Onyń aıtýynsha, mobıldi qosymshanyń kómegimen dárigerge 28 645 qabyldaýǵa jazylý, 1 249 úıge shaqyrtý, 5 032 júktiligine baılanysty esepke turý jáne 23138 ret 5 jasqa deıingi balalardyń ata-analaryn tirkeý syndy qyzmetter paıdalanylǵan.
«Oblysymyzdaǵy 49 emhanada densaýlyq saqtaý salasynda kóp qoldanylatyn dárigerdi úıge shaqyrtý, dárigerdiń qabyldaýyna jazylý, medısınalyq uıymdarǵa tirkelý syndy qyzmetterge qol jetkize alatyn medısınalyq aqparat júıesi iske qosyldy. Túrkistan oblysy boıynsha qaǵazsyz tehnologıa 2018 jyldyń 2 sáýirinen bastap iske qosyldy. Oblys boıynsha medısınalyq qujattamany qaǵazsyz negizde júrgizý 32 paıyzdy qurap otyr», – dedi Bastar Áýelhanuly.
Jyldyń sońyna deıin densaýlyq saqtaý salasy boıynsha 100 paıyz tehnıkamen qamtamasyz etip, tolyǵymen qaǵazsyz qujat aınalymyna ótý josparlanǵan. Sondaı-aq, mobıldi qosymshasymen turǵyndardyń 30 paıyzyn qamtý kózdelip otyr.
Túrkistan oblysy ákiminiń baspasóz qyzmeti
