Túrkistan oblysynyń ákimi Darhan Satybaldy bastaǵan delegatsiia Qytai Halyq Respýblikasyndaǵy jumys saparyn Ýhan qalasynda jalǵastyrdy. Hýbei ólkesine qaraityn bul aimaq eldiń eń iri ekonomikalyq ortalyqtardyń biri jáne ortalyq Qytaidyń eń iri aýylsharýashylyq provintsiialarynyń biri. 60 millionnan astam halqy bar Hýbei maqta óndirisinde kósh bastap tur. Sapar aiasynda oblys ákimi Hýbei provintsiiasynyń gýbernatory Van Chjenpýmen kezdesip, baýyrlastyq memorandýmyna qol qoidy, dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Qujat óńir arasyndaǵy ózara túsinistik pen baýyrlastyqty nyǵaitý, sondai-aq ózara tiimdi yntymaqtastyqty qamtidy. Kezdesý basynda Darhan Amangeldiuly QHR-ǵa jumys sapary barysynda oblystyq delegatsiiaǵa kórsetilgen meimandostyq pen jyly qabyldaýlar úshin Hýbei provintsiiasynyń gýbernatoryna alǵysyn bildirip, óńiraralyq yntymaqtastyq ornatýdyń mańyzdylyǵyn aitty. Kezdesý qorytyndysy boiynsha taraptar turaqty túrde bailanysta bolyp, eki jaqqa tiimdi jobalardy júzege asyrýǵa kelisti.
Túrkistan oblysynyń Qytaiǵa delegatsiiasyn basqarǵan óńir basshysy Darhan Satybaldy Ýhan qalasyndaǵy isker toptarmen kezdesip, óńirdiń áleýetin tanystyrdy. Oblys ákimi bastaǵan delegatsiia Hýbei halyqaralyq kásiporyndar yntymaqtastyǵy qaýymdastyǵynyń atqarýshy tóraǵasy jáne Bas hatshysy Hýan Lisiamen kezdesti. Onda Hýbei halyqaralyq kásiporyn qaýymdastyǵymen yntymaqtastyq týraly memorandýmǵa qol qoiyldy. Kezdesý barysynda eki eldiń aimaqtary arasyndaǵy bailanys tulǵalary taǵaiyndaldy. Qazaqstan-Hýbei bailanys ortalyǵyn qurǵany úshin Túrkistan oblysy ákimi tóraǵa Hýan Chjoýjenge kýálik tapsyrdy. Sonymen birge Qadylbek Jalyn men Hýan Lisiaǵa qazaqstandyq bailanys tulǵasynyń kýáligi berildi. Sonymen qatar oblys ákimi Hýbei provintsiiasynyń isker toptarynyń ókilderimen kezdesýler ótkizdi. Maqta óńdeý zaýytyn salý, Túrkistan oblysyna tikelei reisterdi ashý, bilim berý, densaýlyq saqtaý, tsifrlandyrý, týrizm, aýyl sharýashylyǵy salasyn damytý týraly kelissózder júrgizdi. Sondai-aq óńir basshysy investorlarmen kezdesip, birlesken jobalardy talqylady. Hýbei ólkesi toqyma ónerkásibinen kósh bastap tur. Ýhan – Qytaidyń Hýbei provintsiiasynyń ortalyǵy. 12 millionǵa jýyq adam turatyn eldiń ortalyq bóligindegi eń kóp qonystanǵan qala. Hýbei provintsiiasy – QHR ekonomikasyndaǵy eń mańyzdy aimaqtardyń biri bolsa, Ýhan – Eýraziianyń mańyzdy logistikalyq ortalyǵy jáne negizgi kólik habtarynyń biri. Bul ózen porty ǵana emes, sonymen qatar Qytaidyń iri temirjol toraby.
