Onyń aıtýynsha, «kóleńkeli ekonomıkamen» kúresýde nátıjeli jumys bar. Aǵymdaǵy jyldyń alǵashqy 6 aıy boıynsha memlekettik búdjet jospary 103% oryndalyp, naqty 151 mlrd. teńge óndirilgen. Oblystyń syrtqy saýda aınalymy 1 mlrd. 249 mln. AQSH dollaryn qurap, ótken jyldyń osy kezeńimen salystyrǵanda taýar aınalymy 322 mln. AQSH dollaryna nemese 35 paıyzǵa ulǵaıǵan.
Jergilikti atqarýshy jáne quziretti organdarmen birlese atqarǵan jumystardyń nátıjesinde jyl basynan búdjetke qosymsha anyqtalǵan ishki rezervter esebinen jalpy 13,2 mlrd. teńge óndirildi. Sondaı-aq, departament basshysy Á.Tilegenov qosymsha kiris kózderin anyqtaý jumystary júrgizilse, salyq salý bazasyn keńeıtýge múmkindikter bar ekendigin naqty dáleldermen baıandap ótti. Atap aıtqanda saýda oryndary men saltanat saraılarynyń (toıhanalar) salyqty ýaqtyly ári zańǵa sáıkes tóleýin qadaǵalaǵan jón. Máselen, salyq tóleýden «Alataý», «Sultan» jáne basqa da saltanat saraılarynan kemshilikter anyqtalyp otyr. İri demalys oryndary da zańnan attap ótip, nebir qýlyqtarǵa baryp jatyr. Aýdan, qalalar aýmaǵynda jergilikti búdjet esebinen jańartylǵan nemese jańadan tartylǵan gaz, sý jelileriniń ýaqtyly tıisti sharýashylyq sýbektileriniń balanstaryna ótkizilmeý saldarynan da múlik jáne jer salyqtaryn joǵaltýda. Osy jáne ózge de jumystardy baıandaǵan departament basshysy zańsyzdyqtarmen kúresý baǵytyndaǵy is-sharalar jalǵasatynyn aıtty.
Oblys ákimi Janseıit Túımebaev salyq jáne búdjetke túsetin basqa da tólemderdiń memleket búdjetine tolyq jáne ýaqytyly túsýi memleketimizdiń ekonomıkalyq damýyna, qaýipsizdigin qamtamasyz etýde jáne halqymyzdyń áleýmettik jaǵdaıyn jaqsartýda mańyzy joǵary ekenin aıtty. Salyqty ýaqtyly jınaý, «kóleńkeli ekonomıkamen» kúres júrgizý jóninde tıisti ýákiletti jáne atqarýshy organdarǵa naqty tapsyrmalar berdi.
– Túrkistan oblysy búdjetiniń 80 paıyzy dotasıa arqyly keledi. Biz dotasıany azaıtý maqsatynda salyqty ýaqtyly tóleýimiz kerek. Kásipkerler tabysyn jasyrmaı, salyǵyn zańǵa sáıkes tólep, janashyrlyq tanytýlary tıis. Mysaly, oblystaǵy 190 qonaq úıden nebári 68 mln. teńge salyq tússe, 436 kásipker salyqty jasyryp otyr. Óńir turǵyndarynyń kólik salyǵynan qaryzy 1 mlrd. teńgege jetken. Bul – oılanarlyq jaǵdaı. Departament basshysy kóptegen máselerdi atap óti. Olardyń bárin baqylaýda ustap, jumysty shıratqan jón , – dedi Janseıit Túımebaev.
Túrkistan oblysy ákiminiń baspasóz qyzmeti
