Túrkistan. Áýejaiǵa barar jolǵa 2,5 mln túp sekseýil otyrǵyzyldy
Taǵy 2500 gektar jerge sekseýil tuqymy sebildi. Al, 400 gektardan astam alqapqa 125 myńǵa jýyq japyraqty aǵash kóshetteri otyrǵyzyldy. Sondai-aq, Kentaý tas jolynyń boiyndaǵy 600 gektardan astam jerge 500 myń ártúrli japyraqty aǵashtar otyrǵyzyldy.
Túrkistan qalasy aýmaǵynda «Jasyl beldeý» qurý maqsatynda otyrǵyzylǵan orman aǵashtarynyń sany artyp keledi. Oblys ákimi Ómirzaq Shókeev shahardy ainaldyra aǵash egip, «Jasyl beldeý» qurý jumystarynyń barysymen tanysty.
Sala basshylaryna qorshaǵan ortany kógaldandyrýǵa qatysty birqatar kemshilikterdi joiýǵa ýaqyt berdi. Óńir basshysy saialy jasyl alqapqa ainalatyn 7700 gektar jerdi jasyl jelekke bóleý arqyly shahardyń aptap ystyǵy men yzǵarly jelinen qorǵan qurýdy kózdeitinin talai aityp keledi.
Jasyl beldeýge jaýaptylarǵa kóshetterdi kútip-baptaý úshin bilikti mamandardyń kómegine júginýdi, sýarý júiesin jetildirýdi tapsyrdy.
Sala mamandarynyń málimetinshe, otyrǵyzylǵan japyraqty aǵash kóshetteriniń kónimdiligi ortasha eseppen 65-70 %-dy quraidy, sekseýil kónimdiligi 35-45 paiyzdy quraidy. Onyń basty sebebi – aýa raiynyń ár túrli bolýy (kóktem aiynan bastap kúnniń ystyǵy, jeldiń udaiy turýy, jerdiń qunarsyzdyǵy jáne tuzdanyp ketýi).
Jasyl beldeý qurý jumystary aiasynda merdigerlermen kelisimshart jasalyp, byltyr kóktem, kúz mezgilinde 1000 gektardan astam jerge japyraqty aǵashtardyń kóshetteri otyrǵyzylǵan. 2020 jyly kúzgi sanaqtyń qortyndysy boiynsha, otyrǵyzylǵan kóshetterdiń kónimdiligi (ónimdiligi) – 23 paiyzdy quraidy.
Biyl kóktemde merdigerler 2 myń gektardan astam alqapqa japyraqty aǵash kóshetterin jáne 2600 gektar alqapqa sekseýil aǵashy kóshetterin otyrǵyzǵan. Jalpy kóshetter otyrǵyzylǵan alqaptyń kólemi 5 myń gektarǵa jýyq. Sondai-aq, «Jasyl aimaq» KMM-si kúshimen 3 myń gektardan asatyn jerge japyraqty aǵash kóshetteri otyrǵyzyldy.
