AQSh-tyń memlekettik departamenti Túrkimenstandy "erekshe alańdaýshylyq týǵyzatyn elder" tizimine qosýdy usyndy. Bul týraly AQSh-tyń álem elderindegi dini senim erkindigi jónindegi komissiiasy (USCIRF) habarlady.
USCIRF - AQSh úkimetiniń táýelsiz keńes berýshi organy. Mekeme álemde din erkindiginiń saqtalýyna baqylaý jasap, AQSh Kongresine, prezidentine jáne memlekettik hatshysyna saiasi keńes beredi. Komissiianyń 2016 jylǵa arnalǵan esebi ótken aptanyń sońynda jariialandy.
Esepte Túrkimenstan úkimeti "dini uiymdarǵa tirkeýge qatysty qiyn talaptar qoiyp, olardyń qyzmetine qatań baqylaý jasaidy, tyiym salady jáne tirkelmegen uiymdardyń qyzmeti úshin qatań jazalaidy" delingen. Sol sebepti Túrkimenstandy "erekshe alańdaýshylyq týǵyzatyn elder qataryna qosý" usynylǵan.
Atap aitqanda, komissiia AQSh biligine Túrkimenstan úkimetine qysym kórsetý arqyly, eldegi ar-ujdan tutqyndaryn bosatýdy talap etýin keńes retinde usyndy.
Túrkimenstanda ondaǵan adam dini aiyptarmen túrmelelerde otyr. Ádette mundai sottalýshylarǵa týǵan-týystary jiberilmeidi, olardyń temir tordaǵy taǵdyry týraly eshteme belgisiz. Buǵan qosa, Túrkimenstan túrmelerinde ondaǵan saiasi tutqyn otyr, olardyń azappen ólgeni túrmeden óli denesi shyǵarylǵanda ǵana belgili bolady.
