Túlekter synyptastaryna úidiń kiltin tabystady
Oblys ortalyǵyndaǵy «Bekzat» shaǵynaýdanynda ornalasqan J.Jabaev atyndaǵy №11, J.Edilbaev atyndaǵy №18 jáne Abai atyndaǵy №31 mektepterin 1999 jyly bitirgen túlekter ózderiniń 20 jyldyq kezdesýleri qarsańynda izgilikti isti qolǵa aldy.
Ataýly kúndi atap ótý maqsatynda bas qosqan úsh mekteptiń túlekteri Ramazan aiynda qaiyrymdylyq sharany ótkizýdi uiǵaryp, ózderiniń arasynan kómekke muqtaj synyptastaryna turǵyn úi salyp berýdi josparlaǵan. Jýyrda osy izgilikti oi iske asyp, taǵy bir otbasy qýanyshqa keneldi.
«Jaqsylyqty áýeli jaqynyńnan basta» degendei, qariia anasymen birge turatyn synyptas jigittiń turmystyq jaǵdaiyn eskergen qurdastary oǵan turǵyn úi tabystaýdy jón kóripti. 1982 jyly týǵan qaiyrymdy azamattar úidiń qurylysyn aiaqtap 3 bólmeli úidi Ramazan aiynda iesine tapsyrdy. Shyn nietpen qolǵa alynǵan is ońdy bolyp, qýanyshqa kenelgen azamattyń úiinde aýyzashar berildi.
Osylaisha oblys ákimdigi qolǵa alǵan «Altyn uiam» jobasyn izgilikti ispen jalǵaǵan túrkistandyq túlekter bir otbasyny qýanyshqa bóledi. Olimpiada chempiony Bekzat Sattarhanov týyp-ósken aýyldyń azamattaryna el de dán riza.
