Týystary Ábliazovtiń bosap shyqqanyn habarlady
BTA Bankiniń eks-basshysynyń bostandyqqa shyqqany jaily Facebook jelisinde Ábliazovtiń qaryndasy Qarlyǵash Ábliazova men Almatynyń Shveitsariiaǵa qashyp ketken eks-ákimi Viktor Hrapýnovtyń uly Iliias Hrapýnov ta jazdy.
Aita keteiik, keshe, 9 jeltoqsanda Frantsiianyń Memlekettik keńesi Muhtar Ábliazovti Reseige ekstraditsiialaý týraly qaýlynyń kúshin joidy. Tutqyndalǵan biznesmendi Reseige berý týraly jarlyqqa eldiń premer-ministri Manýel Vals 2015 jyldyń qyrkúieginde qol qoiǵan bolatyn, alaida Ábliazovtiń advokattary apelliatsiialyq shaǵym túsirgen edi.
"Ábliazovtiń ekstraditsiiasy saiasi maqsattarda suralǵan deýge negizder bar nemese osydan onyń saiasi jaǵdaiy nasharlaýy múmkin", - dep málimdedi Memkeńestiń otyrysynda baiandama jasaǵan adam.
AFP málimetinshe, Memkeńes mundai qadamǵa buǵan deiin bir-aq ret barǵan. Ol kezde ispan oppozitsionerin Franko biligi suraǵan bolatyn.
Eske salaiyq, qazaqstandyq BTA Banktiń burynǵy basshysy Ábliazov 2013 jyldyń shildesinde frantsýzdyń Alp taýlarynda ustalyp, sodan beri Parijdiń ońtústigindegi Fleri-Meroji kommýnasyndaǵy abaqtyda jatqan. Ol birqatar qylmys jasady dep aiyptaldy, sol aiyptardyń ishinde alaiaqtyq, qujattardy qoldan jasaý, ókilettikti teris maqsatta paidalaný baptary bolǵan. Al onyń keltirgen jalpy shyǵyny birneshe milliard dollarǵa baǵalanǵan.
Ábliazovtiń bank basshylyǵyndaǵy qyzmeti Reseide, Qazaqstanda jáne Ýkrainada qylmystyq qýdalaýǵa ushyrady, alaida eks-bankirdi Resei men Ýkraina ǵana surap otyr, sebebi Astana men Parij arasynda ekstraditsiia týraly kelisim joq. Ábliazovqa qatysty is 2009 jyly qozǵalǵan edi, sodan beri ol Qazaqstannan qashyp ketip, kóp ýaqyt boiy Ulybritaniiada ómir súrdi, keiin bul elden de ketýge májbúr boldy
