Onyń aitýynsha, búginde otbasylyq sharalarǵa tyiym salynsa da, halyq toidy tyǵylyp ótkizedi. Ondaida virýstyń taralý qaýpi kúsheie túsedi. Sondyqtan ondai sharalar, shyn máninde, indettiń taralýyn toqtatýǵa esh áser etip otyrǵan joq.
"Ókinishke orai, virýs ómirimizdiń turaqty faktoryna ainalýda. Al ómir jalǵasýda: jastar otbasyn qurady, adamdar týylady jáne qaitady. Bizdiń halqymyz qyzyǵyn da, qaiǵysyn da jaqynymen birge bólisken edi. Al búginde azamattarymyz keń ǵimarattarda saqtyq sharalaryn saqtai otyryp ótkizetin otbasylyq sharalardy antisanitarlyq tar jerlerde tyǵylyp ótkizýge májbúr bolýda", - dedi Dúisenbinov májilistiń jalpy otyrysynda.
Depýtattyń oiynsha, shekteý sharalary kózboiaýshylyqqa, indetpen kúrestiń beishara kórinisine, tipti, jemqoryqqa ainalyp ketken. Sebebi resmi túrde shekteý bolsa da, is júzinde januialyq sharalar men toi-jiyndar páterlerde, jeke úilerde jáne shaǵyn dámhanalarda ótip jatyr.
"Onyń ústine, óńirlerde sheneýnikterge jaqyndyǵy bar nemese "qajet jerde" qunyn tólegen meiramhanalar táýlik boiy eshqandai shekteýsiz, qonaqtar sanyna qaramai jumys isteitindigi de eshqandai da qupiia emes. Sondai-aq qoǵamdyq kólikterdegi iin tiresken adamdar men halyqqa qyzmet kórsetý ortalyqtaryndaǵy uzyn-sonar kezekterdi kórgende qandai sanitarlyq normalar týraly aitýǵa bolady?! ", - dep atap ótti depýtat.
Osyǵan bailanysty "Aq jol" fraktsiiasynyń depýtattary úkimetke depýtattyq saýal joldap, birneshe usynys jasady.
Olar:
- otbasylyq sharalardy ótkizýge tyiym salynatyn bolsa, onda búginde shekteýdiń nátijesinde qańyrap bos turǵan ǵimarattardy odan ári paidalaný, olardy jańa maqsatqa beiimdeýge mektepter, aýrýhanalar, sport mekemelerine ainaldyryp, qaita jabdyqtaýǵa kómektesý;
- otbasylyq sharalar ótkizýge ruqsat etilgen jaǵdaida daǵdarystan shyǵarýǵa qaýqarly, qajetti, ári kásipkerlerge túsinikti, ádil sharalardy qarastyra otyryp, shekteýden retteýge kóship, biznes obektilerin qaita jandandyrýdy jáne restoratorlardyń karantindik talaptardy oryndaý maqsatynda ázirlegen usynystar paketin qarastyrý;
- indetti fors-major retinde resmi túrde moiyndap, toqtap turǵan shaǵyn jáne orta biznes nysandary boiynsha kommýnaldyq tólemderge, múlik salyǵyna jumsalatyn basqa da shyǵyndardy óteý.
