Áskerı-áýe kúshteriniń jas býyn ofıserleri úshin bul eńbek sińirgen synaqshy ushqysh ári ǵaryshkerden ózindik bir sheberlik synyby boldy. Olar ǵaryshkerdiń óz aýzynan onyń ómirbaıany men kásibı qyzmeti týraly tanysýǵa múmkindik aldy. Kezdesýge Toqtar Áýbákirovtiń áskerı ómiriniń kýágerleri de qatysty. Odan basqa, is-sharaǵa Halyq batyry Toqtar Áýbákirovti mysal retinde kórsete otyryp, qazaqstandyq ushqysh tulǵasyn qalyptastyrý týraly baıandamamen sóz sóılegen qazaqstandyq ǵaryshker avıasıa general-maıory Aıdyn Aıymbetov qatysty.
Toqtar Áýbákirov tyńdaýshylarmen óziniń estelikteri, jeke tájirıbesimen bólisip, tipti, óziniń tabysqa jetýiniń basty qupıasyn ashty. «Ózińe batyr bolýdy mindetteme. Ol eshqashan júzege aspaıdy. Ár kún saıyn óz-ózine mindet qoıyp, men batyr bolýǵa daıynmyn ba?», – degen saýal qoıǵan abzal. Sizdiń tabysqa jetýińiz áskerı ǵylymdy qanshalyqty jaqsy deńgeıde oqyp-úırengenińizge tikeleı baılanysty ekenin naqty túsingen jón. Tehnıka men aerodınamıkanyń qyr-syryn bilmeseń, daryndylyǵyn esh kómektespeıdi. Kún saıynǵy eńbek pen bilim qýý qumarlyǵy - sáttilikke aparar birden-bir jol», – dedi ol.
İs-sharaǵa qatysýshylar áskerı ushqysh, ǵaryshker jáne Qazaqstannyń halyq batyrynyń dara joly qalaı bastalǵanyn QR QK Ulttyq áskerı-patrıottyq ortalyǵy murajaıynyń zaldarynyń birinde uıymdastyrylǵan fotokórmeniń arqasynda eske túsirip, bildi. 27 shildede general-maıor Toqtar Áýbákirov 70 jasqa tolatynyn aıta ketken jón.
Qazaqparat
