Memleket basshysy Ulttyq qaýipsizdik komitetiniń tóraǵasy Ermek Saǵymbaevty qabyldady, dep habarlaidy Dalanews.kz.
Prezidentke vedomstvonyń jyl basynan beri atqarǵan jumysynyń nátijesi men aldaǵy kezeńge arnalǵan mindetteri jóninde esep berildi.
Ermek Saǵymbaevtyń aitýynsha, UQK materialdary negizinde 43 adam lańkestik pen dini ekstremizm baby boiynsha sottalǵan jáne 34 adam tergelip jatyr. Terrorizm men ekstremizmge qatysy bar 212 sheteldiktiń Qazaqstanǵa kirýine jol berilmedi. Radikaldy uiymdarǵa múshe 1498 sheteldik adamnyń elimizge kelýine shekteý qoiyldy. Terroristik jáne ekstremistik qylmystar jasaǵany úshin izdeýde júrgen 12 sheteldik azamat ustaldy.
Qasym-Jomart Toqaevqa Terrorizmge qarsy ortalyqtyń kezekti otyrysy ótkizilgeni jóninde málimet berildi. Ekstremizm men terrorizmge qarsy is-qimyldyń memlekettik júiesin damytýǵa arnalǵan keshendi jospardy júzege asyrý barysy qaraldy. Qazaqstan arqyly lańkesterdi alyp ótý, lańkestik áreketke qajetti qarjyny aýdarý faktilerin eskere otyryp, terrorizm qaýpin tómendetý boiynsha qosymsha sharalar ázirlendi.
Memleket basshysyna Ishki ister ministrligimen birlesip, 13 qylmystyq toptyń qyzmeti toqtatylǵany, olardyń 142 múshesi ustalǵany jáne 40 adam ustalǵany baiandaldy. Zańsyz ainalymda júrgen 282 atys qarýy, 48 granata men 4586 oq-dári tárkilengen.
Esirtki óndiretin 12 zerthana, sondai-aq, 13 halyqaralyq jáne 12 óńirlik tasymal arnasy joiylǵan. Zańsyz ainalymnan 3,2 tonna esirtki men psihotrop zattar, 7,5 tonna prekýrsor alyndy.
Sybailas jemqorlyq pen quqyqqa qaishy basqa da áreket jasaǵan memlekettik jáne quqyq qorǵaý organdarynda jumys isteitin 15 laýazymdy tulǵa quryqtaldy. Ekonomikalyq qaýipsizdikti qamtamasyz etý aiasynda 1,6 trillionnan asa teńge kóleminde memleketke keltiriletin zalalǵa tosqaýyl qoiylyp, onyń 220 milliard teńgesi qazynaǵa qaitaryldy.
Memlekettik shekarany buzǵan 16 myńnan astam adam ustaldy. 3025 tulǵa elden shyǵaryldy. Qarý-jaraq pen oq-dári, esirtki jáne basqa da tyiym salynǵan zattardy alyp ótpek bolǵan 600-den asa fakti áshkerelendi. Shekara arqyly 11 milliard teńge men quny 16,6 milliard teńge bolatyn taýarlardy zańsyz alyp ótýge jol berilmedi.
Sonymen qatar, memlekettik organdardyń aqparattyq júiesine jasalǵan 796 million kibershabýyl áshkerelengen.
Kezdesý sońynda Prezident ulttyq qaýipsizdik organdary qyzmetiniń baǵyttary boiynsha birqatar tapsyrma berdi.
