Memleket basshysy Qasym-Jomart Toqaev Ulttyq quryltaidyń úshinshi otyrysynda syrtqy saýda men aqparattyq tehnologiialar salasyna qatysty máselelerdi kóterdi, dep habarlaidy Dalanews.kz.
Ol ekonomika salasyn damytýǵa septigin tigizetin negizgi áreketterdi atady.
"Elimizdiń aýmaǵy arqyly ótetin kólik dálizderin birtindep damytyp, syrtqy saýda ainalymynyń ulǵaiýyna barynsha jaǵdai jasaýymyz kerek. Sol úshin logistika ortalyqtary men qoimalar salyp, temir jol qurylysynyń qarqynyn arttyramyz. Sondai-aq teńiz tasymalynyń infraqurylymyn jaqsartyp, ózgertýge yńǵaily tarif saiasatyn júrgizemiz. Munyń bári elimizdiń turǵan jerin barynsha tiimdi paidalanýǵa múmkindik beredi. Ekonomikanyń kóptegen salasyn damytýǵa septigin tigizedi",-dedi Prezident.
Sonymen qatar Toqaev IT-tehnologiialar salasyna da erekshe basymdyq berip, ony damytý joldaryn qarastyrýdy usyndy.
"Men jaqynda "Qazaqstan temir joly" kompaniiasynyń Innovatsiia ortalyǵynda boldym. Ortalyq qyzmetiniń arqasynda eńbek ónimdiligin arttyrýǵa, shyǵyndardy azaitýǵa múmkindik betetin ozyq tehnologiia osy salaǵa engizilip jatyr. Bul jumysqa elimizdiń jáne sheteldiń bilikti IT-mamandary jumyldyryldy. Temir joldyń ótkizý qabiletiniń artýy, janar-jaǵarmaidyń únemdelýi jáne kompaniia tabysynyń kóbeiýi – tsifrlandyrý isiniń naqty ári kózge kórinetin nátijesi. Tsifrly ekojúieni osylai qalyptastyrý kerek. Úkimet osy jumystyń aýqymyn keńeitip, ony ekonomikanyń barlyq salasyna engizýge tiis",-dedi Qasym-Jomart Toqaev.
