Memleket basshysy Qasym-Jomart Toqaev qazaqtyń "jumsaq kúshi" degen sózdiń máni men mańyzyna toqtaldy, - dep habarlaidy Dalanews.kz.
"Strategiialyq baǵdarymyz Qazaqstannyń memlekettiligin nyǵaitýǵa jáne halyqtyń turmysyn jaqsartýǵa baǵyttalǵan. Elimizdiń barlyq azamaty, ásirese jastar muny jaqsy túsinýi kerek jáne reformalardan shet qalmaǵany abzal.
Búgingi jas urpaq jańǵyrý úderisterine atsalysyp, elimizde júrgizilip jatqan reformalardyń igiligin tolyq sezinýi qajet. Daryndy, talapty jáne eńbekqor jastar, onyń ishinde ǵalymdar – zamanaýi Qazaqstannyń jarqyn kelbeti. Jas ári tereń bilimdi azamattar – ultymyzdyń basty kapitaly jáne qoǵamdaǵy oń ózgeristerdiń qozǵaýshy kúshi.
Halqymyz qashanda jańashyldyqqa qushtar bolǵan. Árdaiym bilimge, shyǵarmashylyqqa jáne jasampazdyqqa umtylǵan, birlik pen yntymaqty tý etken. Búginde halqymyzdyń joǵary bilim deńgeii, ozyq oilaý júiesi, azamattardyń jaýapkershiligi, kóp tildi jetik meńgerýi jáne mádeni áralýandylyǵy ulttyq biregeiligimiz ben qazaqtyń "jumsaq kúshi" deitin uǵymnyń negizin quraidy. Munyń bárin bir aýyz sózben qazaqtyń "jumsaq kúshi", iaǵni "soft power" deýge bolady", - dedi Prezident.
