Memleket basshysy energetika ministri Erlan Aqkenjenovti qabyldady, – dep habarlaidy Dalanews.kz.
Qasym-Jomart Toqaevqa elimizdegi otyn-energetika kesheniniń jai-kúii, negizgi jobalardy iske asyrý barysy men salany odan ári damytý jospary týraly esep berildi.
Prezidentke otandyq munai óńdeý zaýyttarynyń qalypty jumys istep turǵany jóninde baiandaldy. Biyl munai óńdeý kólemin 17,6 million tonnaǵa jetkizý josparlanyp otyr. Sondai-aq, ministr munai óńdeý salasyn damytýdyń 2040 jylǵa deiingi tujyrymdamasy ázirlenip jatqanyn málimdedi.
Erlan Aqkenjenov gaz óndirý, Qashaǵan, Qarashyǵanaq ken oryndarynda jáne Jańaózen qalasynda jańa gaz óńdeý zaýyttaryn salý josparyn tanystyrdy. «Beineý – Bozoi – Shymkent» magistraldi gaz qubyrynyń ekinshi jelisi jáne «Taldyqorǵan – Úsharal» gaz qubyrynyń qurylysy jalǵasyp jatyr.
Qasym-Jomart Toqaevqa qýaty 26 gigavattan asatyn jańa generatsiialaý keshenderin iske qosý kózdelip otyrǵany aityldy. Bul 2035 jylǵa qarai ishki suranysty óteý maqsatynda qolǵa alyndy.
Kezdesý sońynda Prezident otyn-energetika sektoryn odan ári damytý boiynsha birqatar tapsyrma berdi. Memleket basshysy munai-gaz, munai-gaz himiiasy jáne elektr energetikasy salalarynda josparlanǵan infraqurylymdyq jobalardy ýaqtyly ári sapaly iske asyrýdyń mańyzyn atap ótti. Qasym-Jomart Toqaev eldiń energetikalyq qaýipsizdigin saqtaýǵa, turǵyndar men óndiristik nysandardy qýat kózimen turaqty qamtamasyz etýge basa nazar aýdarý qajet dep sanaidy.
Prezident investitsiialyq klimatty jaqsartý úshin keshendi sharalar qabyldaý, geologiialyq barlaýǵa strategiialyq investorlardy tartý mindetterin júktedi.
