Memleket basshysy densaýlyq saqtaý ministri Aqmaral Álnazarovany qabyldady, dep habarlaidy Dalanews.kz.
Prezidentke densaýlyq saqtaý júiesiniń qazirgi jai-kúii men salany damytý perspektivasy jóninde esep berildi.
Qasym-Jomart Toqaevqa negizgi meditsinalyq-demografiialyq kórsetkishter týraly baiandaldy. Ministr jalpy jáne náresteler ólimi 15,3 paiyzǵa tómendegenin aitty. Qazaqstanda juqpaly emes aýrýlardan merziminen buryn qaitys bolǵandar sany 25 paiyzǵa azaidy. Osylaisha, Dúniejúzilik densaýlyq saqtaý uiymynyń maqsatty kórsetkishine qol jetkizildi.
Memleket basshysyna meditsinalyq kómektiń qoljetimdiligin arttyrý, alǵashqy meditsinalyq járdemdi jetildirý, skrining baǵdarlamalarynyń aiasyn keńeitý jáne ana men bala densaýlyǵyn qorǵaý qyzmetin jańǵyrtý jóninde aityldy.
Onkologiialyq qyzmetti damytý sharalary jalǵasyp keledi. Astana qalasyndaǵy jańa onkologiialyq keshenniń bazasynda Protondy terapiia ortalyǵy ashyldy. Qyzylorda jáne Aqtaý qalalarynda 2 jańa PET/KT kesheni iske qosyldy. Barlyq óńirde sarapshylyq endoskopiia ortalyqtarynyń jumysy jolǵa qoiyldy.
Ulttyq ǵylymi onkologiia ortalyǵy men aimaqtardaǵy birqatar nysan qurylysy aiaqtaldy.
Budan bólek, MÁMS júiesindegi qarjyny baqylaýdy kúsheitý, sonyń ishinde qarajatty maqsatty jumsaýdy monitoringteý júiesin avtomattandyrý jáne meditsinalyq qyzmet kórsetýshilerge talapty qatańdatý sharalaryna basa nazar aýdaryldy.
Ministrlik Memleket basshysynyń tapsyrmasyn oryndaý maqsatynda Densaýlyq saqtaýdyń biryńǵai tsifrlyq infraqurylymyn qalyptastyrý boiynsha jumys júrgizip jatyr. Jeke-jeke qyzmet kórsetetin aqparat júielerin E-Densaulyq platformasyna biriktirý qolǵa alynǵan.
Ministr sońǵy eki jylda farmatsevtika ónerkásibine salynǵan investitsiia kólemi 2,3 ese, al dári-dármektiń eksporty 1,9 ese óskenin baiandady. Dári-dármektiń 400-den astam túrin óndirý boiynsha 6 investitsiialyq kelisim jasaldy. Olardyń jalpy quny 316,3 milliard teńgege baǵalanǵan.
Sondai-aq Qasym-Jomart Toqaevqa salanyń kadrlyq áleýetin damytý, meditsina qyzmetkerlerine áleýmettik qoldaý kórsetý jóninde aqparat usynyldy.
Prezident meditsinalyq qyzmet sapasyn arttyrý, saladaǵy qarjylyq tártipti qatańdatý, maman daiarlaý júiesin jetildirý, tsifrlyq jańǵyrtý jumystaryn jedeldetý jáne otandyq farmatsevtika ónerkásibin órkendetý boiynsha birqatar tapsyrma berdi.
