– Óńirlik bılik pen aýmaqtyq quqyq qorǵaý bólimsheleriniń basshylary kásipkerlermen birigip, bıznesti qoldaý degen syltaýmen únemi zańsyz áreketterdi júzege asyratyny jasyryn emes.
Bul – úlesti ózara bólisip alǵan degen sóz. Munyń bári sybaılas jemqorlyqqa, kóleńkeli áreketterge, ákimshilik resýrstarǵa negizdelgen tenderler men búdjet qarjysyn ońdy-soldy shashýǵa baǵyttalǵan qazaqstandyq bıznestiń ashshy da bolsa shynaıy beınesin qalyptastyrdy.
Mundaı qylmys túrlerine memleket batyl ári mindetti túrde júıeli tosqaýyl qoıýǵa tıis. Bul – úlken mindet. Otandyq bıznestiń dál osyndaı sıpaty tutas memlekettiń bedeline zor nuqsan keltiredi.
Basqasha aıtqanda, elimizde eshqandaı da qoldaýshy tirek pen reıderlik bolmaýy kerek. Eger bıznes adal jumys isteýge daıyn ári kreatıvti, zamanǵa saı suranysqa ıe bolsa, ony qoldaý qajet.
Ulttyq ekonomıkanyń jańa modeline enýge kómektesý kerek. Biz bıznes pen memleket múddesi arasyndaǵy teńgerimdi qatań saqtaýǵa tıispiz, – dedi Prezıdent.
Memleket basshysy osy máselelerdi sheshý úshin birqatar naqty sharany belgilep berdi. Qasym-Jomart Toqaevtyń pikirinshe, eń aldymen, quqyq qorǵaý organdary tarapynan negizsiz qýdalaýdy azaıtý jóninde júıeli sharalar qabyldaý qajet ekenin eskertti.
– Sońǵy bes aıda prokýrorlar 100 myńǵa jýyq kásipkerdiń quqyǵyn qorǵady. Bul shamamen tutas 2021 jylǵy kórsetkishke jýyqtaıdy. Atalǵan derekter tergeý organdarynyń bıznesti qylmystyq qýdalaýǵa májbúrli túrde tartyp jatqanyn bildiredi.
Bas prokýratýra kásipkerlik sýbektilerine qatysty baqylaý-qadaǵalaý, ásirese tergeý áreketterin zańsyz júrgizýge jol bermeýdi barynsha qatań baqylaýdy qamtamasyz etýge tıis, – dedi Prezıdent.
