Májilis depýtaty Oljas Quspekov premer-ministrdiń orynbasary - ulttyq ekonomika ministri Serik Jumanǵaringe joldaǵan saýalynda kólikterdiń aldyńǵy búiir áinekterin aqyly boiaýdy zańdastyrý máselesin kóterdi, – dep habarlaidy Dalanews.kz.
Depýtat budan biýdjettiń de upaiy túgendeletinin aitty. Ulttyq statistika biýrosynyń resmi málimetteri boiynsha 2025 jylǵy 1 mamyrǵa deiin elimizde 6 mln 176 myń kólik tirkelgen, onyń 86,5%-y - jeńil kólik.
"Avtoparktiń 5%-i qamtylǵan jáne ruqsattyń ortasha quny 50 AEK bolsa da, biýdjetke túsetin túsim kólemi jylyna 50 mlrd teńgeden asýy múmkin. Bul qarajat infraqurylymdy qalpyna keltirýge jáne damytýǵa, tasjoldardy jóndeýge jáne ustaýǵa paidalanylýy múmkin", - dedi ol.
Al Keden odaǵynyń "Dońǵalaqty kólik quraldarynyń qaýipsizdigi týraly" tehnikalyq reglamentine sáikes kem degende 70% jaryq ótkizgen jaǵdaida aldyńǵy búiir áinekterde tonirovka qoldanýǵa ruqsat etiledi.
"Bul talaptar tonirovkany zańdastyrýdyń ulttyq tásiliniń negizin qalaýy kerek. Aqyly memlekettik qyzmetterdi paidalanýdyń tabysty tájiribesi bar. Máselen 2024 jyly biýdjet VIP-memlekettik nómirlerdi satýdan 15,8 mlrd teńge tapty, bul osyndai sheshimderdiń tiimdiligin rastaidy", - dedi Oljas Quspekov.
Depýtat álemdik tájiribeni de mysal retinde keltirdi.
"Halyqaralyq tájiribe zańdastyrylǵan aqyly tonirovkanyń tiimdiligin rastaidy. Máselen Qyrǵyz Respýblikasynda tonirovkaǵa ruqsat berýden 2024 jyly biýdjetke shamamen 4 mlrd teńge tústi. Ózbekstanda jaryq ótkizýge ruqsat 70%-dan bastap beriledi. BAÁ men Ońtústik Koreiada tehnikalyq talaptar men baj salyǵyn tóleý kezinde aldyńǵy áinekterdi 50% jáne 40% deiin boiaýǵa ruqsat etiledi", - dedi ol.
Oljas Quspekov Úkimetke mynadai usynys joldap otyr:
"Ýákiletti organdarǵa ruqsattardy resimdep, biýdjetke paida túsirý úshin kem degende 70% jaryq ótkizgen jaǵdaida kólikterdiń aldyńǵy búiir áinegin aqyly boiaýdy zańdastyrý tetigin ázirleý kerek".
