Beiresmi jumyspen qamtýdyń joǵary deńgeii kóbinese jumys sapasynyń nasharlaýyna jáne soǵan bailanysty tómen jalaqy problemalaryna, oqytýǵa qoljetimdiliktiń shektelýine, áleýmettik qamsyzdandyrýdyń nemese kelisimsharttyq eńbekti qorǵaýdyń az nemese múldem bolmaýyna ákeledi. Bul quramdastardyń árqaisysy eńbek naryǵynyń sapasyna ǵana emes, eń aldymen ózin-ózi jumyspen qamtyǵan azamattardyń ál-aýqatyna keri áserin tigizedi.
Osyǵan bailanysty Qazaqstan Respýblikasynyń kásipodaqtar federatsiiasy qoldanystaǵy eńbek zańnamasyna ózgerister men tolyqtyrýlar engizý boiynsha birneshe jumys toptaryna qatysyp jatyr. Sondai-aq, eńbek salasyndaǵy ózekti máselelerdi sheshý úshin Úkimetke birqatar sharalarǵa bastamashylyq etedi. Máselen, Bas kelisimde kásipodaqtardyń kóptegen bastamalary boldy.
Kásipodaq Bas kelisimge eń tómengi jalaqy mólsherin kezeń-kezeńimen ulǵaitý, ony jyl saiynǵy indeksteý, HEU-nyń №131 «Damýshy elderde eń tómengi jalaqyny belgileý týraly» konventsiiasyn ratifikatsiialaý máselesin engizý syndy mańyzdy dúnielerge qol jetkizdi.
Laiyqty eńbek tujyrymdamasyn júzege asyrý úshin áleýmettik seriktestermen Jol kartasyn ázirledi. Biz áleýmettik seriktestikterdiń qaraýyna eń tómengi jalaqyny anyqtaý ádistemesin daiyndaý jáne ony dáiekti túrde arttyrý qajettigi týraly máseleni birneshe ret usyndyq.
Qazaqstan Prezidenti Qasym-Jomart Toqaev el turǵyndaryna arnaǵan Joldaýynda kásipodaqtyń bul bastamasyna qoldaý kórsetti. Memleket eń tómengi jalaqyny anyqtaýdyń jańa ádistemesin engizedi, ol onyń mólsherin birtindep ulǵaitady. Al qazirdiń ózinde kelesi jyldyń basynda eń tómengi jalaqy 60 myńnan 70 myń teńgege deiin ósetini belgili boldy. Bul jumys isteitin 1,8 million qazaqstandyqqa tikelei áser etedi.
Ústimizdegi jyldyń sáýir aiynda Úkimet qabyldaǵan «Halyq tabysyn arttyrýdyń 2025 jylǵa deiingi baǵdarlamasyna» engizý úshin kásipodaqtar federatsiiasy da birqatar usynystarǵa bastamashy boldy.
Eń aldymen kásipodaqtar federatsiiasy eńbekaqy júiesin anyqtaý tetikterin qaita qaraý týraly usynys jasady. Baǵdarlamany iske asyrý halyqtyń naqty tabystarynyń ortasha jyldyq ósý qarqynyn 4-5 paiyz deńgeiinde, 2 millionnan astam jumys ornyn qurýǵa, JIÓ-degi jalaqy úlesin arttyrýǵa ákeledi dep kútilýde. Baǵdarlamada oblys, aýdan, qala ákimderi úshin halyqtyń árbir 10 myń turǵynyna keminde 100 jańa jumys ornyn qurý kórsetkishi belgilengenin aita ketken jón.
Gúlnar JUMAGELDIEVA, Qazaqstan Respýblikasynyń kásipodaqtary federatsiiasy tóraǵasynyń orynbasary
