Buǵan deıin japonnyń Sports Hochi basylymy Tımanovskaıany qaýipsiz jerge kóshiredi dep habarlaǵan bolatyn.
2 tamyz túnde taratqan HOK málimdemesinde komıtet músheleri men Japonıa resmı tulǵalarynyń Tımanovskaıamen tikeleı tildeskeni jazylǵan.
HOK ókili Mark Adamstyń sózine qaraǵanda, ol áýejaıdaǵy qonaqúıge qonyp shyqqan, onyń qaýipsizdigin polısıa qamtamasyz etip jatyr.
HOK belorýs sportshysyn qoldaıtynyn jáne dúısenbi kúni tańerteń onymen taǵy da sóılesetinin habarlady.
Osyǵan deıin belorýs úkimetine narazylardy jyly qabyldaǵan kórshi Polsha belorýs sportshysyna kómekteskisi keletinin aıtty.
Polsha syrtqy ister vıse-mınıstri Marsın Pshıdach Twitter-de Tımanovskaıaǵa gýmanıtarlyq vıza usynylyp, eger qalasa, Polshada karerasyn jalǵastyrýǵa múmkindik jasalatynyn jazdy.
Chehıa syrtqy ister mınıstri Iakýb Kýlhanek Belarýs tóńiregindegi jaǵdaıdy "daýly" dep atap, Chehıa Tımanovskaıaǵa kómektesýge daıyn dep málimdedi.
Biz oǵan elge kirýge múmkindik beretin vıza usynamyz, osylaısha halyqaralyq kómekke qol jetkizý úshin ótinish bere alady. Bizdiń Tokıodaǵy elshiligimiz de kómektesýge daıyn, dedi cheh dıplomaty.
Birneshe saǵattan soń Tımanovskaıa Japonıada qaýipsiz jerde ekenin jáne ózin polısıa kúzetip turǵanyn habarlady. Onyń habarlamasyn BSSF qorynyń Telegram arnasy jarıalady.
BSSF ókili Aleksandr Opeıkın AP agenttigine Tımanovskaıa Aleksandr Lýkashenko úkimeti jaqtastarynyń nysanyna aınaldy dep málimdedi. Onyń aıtýynsha, Tımanovskaıa Avstrıa elshiliginen saıası baspana suramaq.
BSSF qory byltyr tamyz aıynda Belarýste "ádiletsiz saılaýdan" keıin tutanǵan narazylyq kezinde sportshy Aleksandra Gerasımenkonyń zeınetaqysyna qurylǵan qor. Atalǵan uıym bılik qysymyna ushyraǵan belorýs sportshylaryna qarjylaı jáne zańgerlik kómek beredi. Qor buǵan deıin demonstranttarǵa kúsh qoldanbaýdy talap etken.
Qańtar aıynda shamamen 350 sportshy ashyq hatqa qol qoıyp, prezıdent saılaýynyń resmı nátıjesiniń kúshin joıýǵa jáne barlyq saıası tutqyndardy, jappaı narazylyq kezinde ustalǵandardy bosatýǵa shaqyrǵan.
Buǵan deıin opozısıalyq Belorýs sport yntymaqtastyǵy qory ókilderi bılik Tımanovskaıany Tokıodan kúshpen áýetýge tyrysyp jatyr dep málimdegen. Aqparatqa qaraǵanda, buǵan sportshynyń áleýmettik jelide belorýs trenerlerin ótkir synap jazǵany túrtki bolǵan.
2 tamyzda Tımanovskaıa 200 metrge júgirýden jarysqa qatyspaq bolǵan. Biraq onyń sózine qaraǵanda, 1 tamyzda onyń bólmesine qurama qyzmetkeri kelip, kúshpen áýejaıǵa alyp ketken. Áýejaıda sportshy polısıadan kómek suraǵan.
Belorýs olımpıada komıteti deportasıalaý týraly sheshim sportshynyń emosıonaldy-psıhologıalyq kúıine baılanysty qabyldanǵanyn habarlady.
Belarýs saıasatkeri Pavel Latýshko ulttyq quramany synǵa alǵa sportshyny shuǵyl túrde elge qaıtarýdy Lýkashenkonyń ózi buıyrǵanyn habarlaǵan.
