Keshe Májiliste depýtattar toǵyzqumalaqtyń atyn ózgertýge qatysty usynys jasady. Qazaqstan toǵyzqumalaq sporty federatsiiasy osy usynysqa jaýap retinde málimdeme jasady, - dep habarlaidy Dalanews.kz.
Federatsiia "ǵasyrlar boiy halyq paidalanyp kelgen tól ataýdan jirený, qasietti uǵymdarǵa nemquraily qaraý - ulttyq qundylyqtar aiasynda qoǵamdy uiystyrýǵa bastamaityn is ekenin" aitty.
"Kóziqaraqty kez kelgen adam "bular basqany qoiǵanda Abaidy tanymai Áýezovti oqymaǵandar ma?" dep qairan qalǵan shyǵar. Bastamashylardyń kimdi oqitynyn bilmeimiz, biraq qaǵidaly aqiqatty túsinbeitini anyq. Toǵyzqumalaq- ulttyń myńjyldyq tarihy bar ziiatkerlik oiyny. IýNESKO ony adamzattyń mádeni murasy dep 2020 jyly moiyndaǵan. Toǵyzqumalaq ultymyzdyń álemdik mádenietke qosqan úlesiniń jarqyn úlgisi bolyp tabylady. Syrttan kelgen birer adam túrli piǵylmen ataýyn burmalasa, ondai tásildi bizdiń mádeniet pen tarihi jadymyzǵa qarsy syrtqy kúshter talai qoldanǵanyn tarihtan da bilemiz. Tarihi, ǵylymi derekkózderde, kórkem jáne aýyz ádebietinde, ulttyń jadynda oiyn tek toǵyzqumalaq dep atalady.
Ulttyq oiynnyń ataýy Parlamentke de, Úkimetke de, toǵyzqumalaq federatsiiasyna da tiesili emes. Ol esh adamnyń, ne uiymnyń menshigine jatpaidy. Oiynnyń da, onyń ataýynyń da iesi - qazaq halqy. Bizdiń perzenttik paryzymyz - toǵyzqumalaqty damytyp, qanatyn keńge jaiý", - dep jazylǵan jaýapta.
Sonymen qatar, qazir álemniń 50 asa elinde toǵyzqumalaq kózbe-kóz oinalsa, internet arqyly 100 memleket turǵyndary túrli saiystarǵa qatysyp, 6 álem chempionaty 25-30 el ókilderiniń qatysýymen ótken.
"Jahanǵa tanymal ziiatkerlik oiyndar saittarynda toǵyzqumalaq kóshbasshy orynda. Qazaqstanda 210 myń adam túrli deńgeide turaqty shuǵyldanýda. Munyń bári ardagerler, jattyqtyrýshylar, oiynshylardyń eńbeginiń, olardy demep, qoldap júrgen federatsiia,toǵyzqumalaq qairatkerleri, kásipkerler, Sport jáne týrizm ministrligi men jergilikti ákimdikter, maslihat depýtattarynyń birlese atqaryp júrgen isteriniń jemisi.
Prezident Qasym-Jomart Toqaevtyń 2022 jyly toǵyzqumalaqty damytýǵa nazar aýdarýy ortaq iske sony serpin berdi. Biz ári qarai da ulttyq murany nasihattap, dáriptep, keńirek taralýyna jumys jasaimyz. Perzenttik paryzymyzdy atqarýǵa eshkim kedergi bola almaidy.
Qazaq barda toǵyzqumalaq dami bermek. Ult aldynda zor mindetter tur. Azamat retinde el damýynyń ózekti máseleleri boiynsha joǵary minberlerden keleli oi aitylǵanyn qalaimyz. Pikir alýandylyǵyn syilai otyryp, qasietti qundylyqtarmen oinaýǵa bolmaitynyn málimdeimiz", - dep jazylǵan Qazaqstan jáne Dúniejúzi toǵyzqumalaq federatsiiasy úndeýinde.
