Atyraý oblysy Jangeldin aýylynda joǵalǵan otbasynyń jaqyndary baýyrlary iz-tússiz ketken kezeńde olarmen tek What’sApp arqyly hat almasqanyn málimdedi. Bul týraly Qazaq AIRAN arnasy jariialady, dep habarlaidy Dalanews.kz.
Óz saraiynan óli tabylǵan Maqsot Qarabalinniń qaryndasy Ádemi Shylmaǵambetova qaiǵyly jaǵdai týraly aitty. Onyń sózinshe, qarashanyń basynda osy otbasynyń Naýryz esimdi uly ápkesine otbasyndaǵy janjaldar týraly habarlama joldaǵan. Alaida osy habarlamadan keiin týystarymen bailanys úzilgen. Alańdaýshylyq tanytqan Ádemi Shylmaǵambetova biraz ýaqyttan soń Naýryzǵa ózi qońyraý shalǵan. Sol kezde otbasy músheleriniń ishinde tek Naýryzdyń telefony qosýly bolǵan.
"Dym qaldyrmai ýaq maldaryn satyp jiberipti degen soń, men qaitadan Naýryzǵa habarlastym. "Ái, Naýryz, ne istep jatyrsyńdar? Ýaq maldaryńdy satyp jiberdi dep aityp jatyr. Ózderi joq dep aitady ǵoi. Qaida kettińder?" dedim. Telefon soqtym ǵoi. Sosyn ol maǵan bylai dep jazdy: "Apamdy Tashkentke alyp kettik. Emdetýge" dedi. Sosyn taǵy bir ainalyp soqtym. "Naýryz, Tashkentte qaida alyp kettińder? Aýrýhanada ma? Sanatoriiada ma? Qaida?" dep edim. "Aǵaiyndarda, tanystyń úiinde" dedi. Telefonmen sóilespeidi, What’sApp-pen jazady. Telefon soqsam, birden jaýap bermeidi. Taǵy ainalyp, taǵy soqtym. "Ainalaiyn, ne istep jatyrsyńdar?" dedim. "Elińde malyń bar. Úiińde gaz janyp tur. Táteń men Meiramgúldi aýylǵa jiber. Sen anańnyń qasynda bol. Apańnyń emi qashan bitedi?" dedim. "Jeltoqsannyń 10-ynda aýylǵa shyǵamyz" dedi", – deidi marqum Maqsot Qarabalinniń qaryndasy.
Aita keteiik, erli-zaiyptynyń óliminen keiin olardyń 33 jáne 35 jastaǵy balalarynan áli habar joq. Al marqumdardyń kúieý balasy – 29 jastaǵy Atyraý turǵyny kúdikti retinde izdestirilip jatyr.
